Azad-a hian Congress hi kum 1970 chho khan Jammu & Kashmir-ah a zawm a, zirlai a nih laiin Mahatma Gandhi, Pandit Jawaharlal Lal Nehru, Sardar Patel, Maulana Abut Kalam Azad, Subhash Chandra Bose leh India-in zalenna a sual laia hruaitu lawk tak takte kal dan leh ngaihdan avanga zawm a nih thu a ziak.
Kashmir University atanga post graduate a zawh hnu, kum 1973 atangin kum 1975 thleng Congress-ah hian block general secretary a ni.
Jammu & Kashmir Youth Congress in president-ah kum 1975 leh 76 khan a tang.
Congress hruaitu hlun hi kum 1977 khan Indian Youth Congress general secretary a ni tan a. Hetih lai hian Congress thalai leh worker dang eng emaw zat nen lung in an lut sek a. Amah a insawi dan chuan a tan hun chhung rei ber hi Tihar jail-a December 20, 1978 atanga January thla tawp, 1979 thleng a nih thu a sawi a, hemi tuma an man hi Indira Gandhi man duh lohna lantirnaa a tel vang niin a insawi.
Kum 1980 khan Azad-a hi Indian Youth Congress-ah national president a ni zui ta a. Kum 1985 vel thleng he nihna a chelh lai hian AICC-ah general secretary a ni bawk.
Thalai hruaitu a nih lai, kum 1982 atang khan union minister a ni tan a, kum 2014 thleng kha chanpual hrang hrang chelhin a ni ta reng a ni.
Rajiv Gandhi-a’n May, 1991-a thah a nih thlenga a kaihhruai, Congress Parliamentary Board-ah pawh a tel ngar ngar a, PV Narasimha Rao-a kaihhruaiah pawh a tel zui zel a. Party rorelna sang ber, Congress Working Committee (CWC)-ah pawh kum 40 dawn a tel bawk.
Rajya Sabha-a oppositioon leader nihna pawh Azad-a hian kum sarih a lo chelh tawh.