Aizawl: Mizoram State Commission for Women (MSCW) chuan August 18, 2022-a Civil Hospital, Aizawla Hortoki nu, Zoramthari thihna chungchangah suo moto-in thubuai an ziak lut a, Hospital & Medical Education director chu he thihna thleng chungchanga an hmalak zui dan report ni sarih chhunga thehlut turin a hriattir.
Hortoki nu, Zoramthari nau chunga a boral chungchangah MSCW chuan thubuai, Suo Moto Case No. 45/2022 a ziak lut a, hriattirna an tihchhuahah hetianga Civil Hospital, Aizawla nau chunga thihna thleng a awm chu chhui chian ngai nia an hriat avangin thubuai an ziak lut tih an tar lang.
He thubuai chhui chiang tur hian Hospital & Medical Education Director chu Opposite Party No. 4 atan ziah luh a ni tih tar langin, he thil thleng chungchanga an hmalak zui dan report felfai tak chu order a hmuh atanga ni sarih chhunga ziaka commission hnena theh lut tura beisei a nih thu Hospital & Medical Education director chu hriattir a ni.
Nau chunga thihna a thlen zui tawh loh nan hmalakna tur awm ang angah chuan chak zawka hma la turin thuneitu hrang hrangte chu commission chuan an beisei tih MSCW chuan an tar lang bawk.
Tar lan tawh thin angin nau nei tura Civil Hospital Aizawla awm mek, Hortoki nu Zoramthari (Tebawihi) w/o Isak Malsawmsanga chu nau a neih hmain August 18, 2022 zing 6:30 khan a thi a, he thihna thleng chungchangah hian Hortoki VC leh tlawmngai pawl hrang hrangte chuan thuchhuah intawm siamin an khaw nu thih chhan chu nurse duty-te inthlahdah vangah puhin, an dem thu an sawi.