AZL: Zirtawpni khan Millennium Centre-a Photo Exhibition vawi 6-na buatsaihna chu I&PR Minister Lalruatkima’n a hawng.
World Photography Day kum 183-na puala Mizoram School of Photography leh Photography Club of Mizoramin an buatsaih photo exhibition-ah hian monochrome leh colour-ah thenin inelna neih a ni a. Mi 39 telin thlalak 130 pho chhuah a ni a. Vawiin hian lawmman dawngtute puan a ni dawn a, colour leh monochrome-a pakhatna hi ram pum huap intihsiakah an tel dawn a ni.
Hawnna inkhawmah khuallian I&PR Minister Lalruatkima’n thlalak thil tihtheihtheihzia sawiin, sawi leh chhiar piah lamah thlalak ngei hian thil thleng a tichiangin a tifiah tih a sawi a. “Thil tisualte man chhuah nan a tangkai a, hmun nuam leh mawi pho chhuahna a nih avangin khualzin hip nan a tangkai a, a tangkaina hi sawi sen a nih loh ang bawkin a hmang sual duh tan thil tha lo tihtheih a ni,” a ti.