- Mahmuaka Chhakchhuak
Eng tik kum nge ka hre thei mai tawh lo a, ka Dairy hlui dahkhawm hai dawn ila hmun dangah ka dah daih bawk si a, rinthu mai lo chuan sawi ngaihna ka hre lo a, kum 2012 vel ni turah ka han ngai ngawt mai. Rev. K. Thanchungnunga hoin ‘Talk Show’ neih tumin kan inbuatsaih a, a hmun atan Bung Bangla hmuna Refidim-a an Biak In (Chapel) chu nisela tiin kan thiante chuan a neitute an lo be fel nghal mai bawk a. He Talk Show hi Pi Hnemi te chhungkuain min sponsor theih dawn bawk avangin kan lawm hle a ni.
Tichuan a hmun leh hma kan va en fel nghal a, a theih ang ang chuan thutnate pawh remin Banner-te pawh kan zar nghal bawk a, kan phur hle a ni. Nilenga Bung Bangla-a kan awm hnuah chuan tlai lamah haw tumin kan inbuatsaih a, lirthei pathum vel chuan kan inzui a, Zemabawk luh hma deuhah hian kawngthlang lamah mi panga vel hi an lo dingin ko thlang lam chu an lo bih hlawm a, eng thil nge ni kan han tih chuan anni chuan ‘helai hmunah hian motor a accident niin kan hria a’ an tih chuan lirthei hungremin keini pawh chuan kan han thlir ve nghal a. Chulai hmun chu a lo kham hle mai a, rui lo hai lo tan pawh tlak hlauhawm tak hi a niin kham ko chu alo sang hle mai. Ngam ang tawka kan han thlir thlak ve chuan thuk tak maiah hian kawr chep laiah mi pakhat hi a lu lamin mawng lai hawi hian a mu niin kan hria a, Digital Camera hmanga kan han zoom ngial pawh chuan a hlat tham avang leh khua a chawhnu tawh lam bawk avang chuan kan chiang ngam meuh lo hlawm a, tlawmngai thei kan awm chuan a hmuna zuk fiah ngei a thain kan hria a.
Chutianga lirthei chesual a nih tak tak chuan tiin Police lam pawh hrilh ngei chu a dik ang tiin kan be pawp nghal bawk a, Zemabawk Welfare lamte pawh kan hrilh bawk a. Police lam chuan a theih ang angin lo la chhuak rawh u an tih avang chuan Zemabawk Welfare te nen chuan hruizen hmangin mi tlawmngaite chuan zuk finfiah tumin an chhuk ta a. Hruizen rinchhan chung zela chhuk a ngaih avangin muangchangin an chhuk thla zel a, mi sawm vel zet tur chuan a hmun an thleng thla a ni. A hmuna chhukthla zingah hian keini team atang pawhin tlangval Thazela Hmar pawh thlengthla hmasa ber zingah a tel a. Hla tak atanga a thleng thla tih kan hriat velehah chuan kan han au vak a, a hriat fiah hleihtheih loh avangin leh network alo tha hlauh bawk nen a Cell Phone ah chuan call nghalin mihring nge ni a tia kan rin chu mihring ngei alo ni a, mipa niin sa tha lam leh lu buk deuh hi alo ni tih min rawn hrilh a, chutih rual chuan ala thih loh thu a rawn sawi nghal bawk avang chuan rilru a hmanhmawh nghal hle mai.
Tichuan, a theih ang anga kawngpuia rawn chhohpui an tum a, thingtuai hmanga zawn an han tum zet a, a hmun a awi tlan si avang chuan a rem chiah loin an hre leh a, Zemabawk Welfare hotupa an tih mai, pa tlawmngai deuh mai chuan a puakin a rawn paw chho ta mai zawk a ni. A ni chuan a hmun atangin kawngpui thlengin a rawn paw chho a, a chak hle mai a, a tlawmngaihna hi chhuanawm tak a ni. Chutianga kan han buai nak nak lai chuan mi an rawn pung zel a, kawngpuia an rawn puak thlen meuh hi chuan mi za chuang fe kan tling hialin a rinawm. Tichuan hmanhmawh takin keini chuan Aizawl Civil Hospital lamah kan phur phei nghal a, kan chhan hman tak hlauhin tiin kan Driver pawh kan tur hmanhmawh bawk a, emergency light a chhit bakah chuan horn a hmet ri tuar tuar mai a, reiloteah kan thleng phei thuai a ni. Casualty-ah chuan lut nghalin Doctor leh Nurse fel tak takte chuan min lo buaipui nghal zung zung a, uluk taka an han enfiah a. Keimah ngei pawh chuan kutkawr (glove) bun vein a tul tulah ka lo buaipui ve bawkin ka lo che ve sek bawk a. A bek vei lamah hian 2 inches vela thui hian alo kak a, a taksa hmun dangah pawh chuan pilh neuh neuh chu a awm bawk a. Hetianga Casualty-a kan buai lai vel hi tlai lam dar 6 alo ri tawh a ni.
A taksa pawn lamah chuan hliam lian tham deuh a awm tawh lo nain a khel vei lamah hian 2 inches vel bawkin kak a lo awm a, Doctor leh Nurse-te chuan a hliam laite chu an han thui nghal zung zung bawk a, chumi hnuah chuan a kaw chhung lamah enge fello a awm takin tiin Endoscope hmang chuan an han en leh a, X-Ray pawh kan ti bawk a ni. Hmuh theih loh lamah chuan fello a awm chiah loin an hria a, ngaihtha deuh takin leh thlaphang deuh bawk si chuan kan awm ta reng a. Chutia buai lutuk a reh takah chuan amah chu tunge kan hre bawk si lo a, a chhungte kan hriat theih bawk si loh avangin Facebook lamah post in, THUDIK LEH NEWS group-ah chuan a thlalak tarlang bawkin a chhungte hria chuan han ngaihven rawh u tiin a chanchin tlem chu kan han ziak nghalin kan kiang hnai vela mite hnenah chuan kan han sawi darh zung zung nghal bawk a. Casualty kawta awmte chuan an han en nak nak chuan ‘Zemabawka awm Lawmsanga niin ka hria’ an han tih chuan Zemabawk lam an han be nghal a, an Lawmsanga tih chu alo la dam tha viau bawk si a. A ni chu a nih chiah dawn loh chu kan tiin tunge ni ang a, khawi a mi nge ni ang ti a rilru kap reng chungin zan dar kua velah Civil Hospital chu kan chhuahsan a.
Inah pawh chuan Fb lama kan thil post chu ka bih zauh zauh bawk a, mut hma chuan comment lamah pawh engmah thu thar kan la hre chuang lo a. A tuk khua alo var hnuah chuan comment pakhat hian ‘Nimin Bike-a ka rawn hawng, ka thianpa pakhatin a rawn phurh kha ni ngei ang’ a rawn ti a. A ni chuan a thianpa chu a han be nghal a, tichuan a thianpa phurh chu Serchhip khua a ni tih a rawn sawi thei ta hlauh maiin a hming pawh Lawmsanga tiin a rawn sawi ta a. Nimahsela chu bak a chanchin hriat zui ngaihna an hre bik chuang lo a. Kei chuan Serchhip khuaa ka thianpa Lalhmaa (Machhuani pasal) hi ka han be nghalin ‘hei niminah Zemabawk daiah in khaw mi Lawmsanga a accident a, a chhungte kan hre thei si lo a, in khua ngei niin kan hria a, lo ngaihven ve teh aw, tunah Aizawl Civil Hospital Casualty-ah a awm mek’ ka han ti a. Lalhmaa chuan engtin tin emaw Lawmsanga chhungte chu a hre thei hlauh mai a, darkar reiloteah Aizawl an rawn thleng thla a, Aizawl Civil Hospital Casualty chu pan ding nghalin rang tak bawk chuan an lut nghal a, nimahsela Doctor-te chuan minute hnih vel lek kal taah khan Chatuan ram alo pan tak thu an lo hrilh a, an hrilh a hai hle mai!
Lawmsanga chhungte nen hian kan inbe ta em ka hre chiang chiah lo a, engtinnge an buaipui tak dan zel pawh ka hre zui ta chiah lo. Hetiang hian midangte pawhin tute emaw chu kan lo vui liam nual tawh bawkin a rinawm a, kan la invui zel bawk mai thei e. Lawmsanga vuiniah pawh hian a chetsual dan chanchin sawi thui tur vak an hre lo ni awm tak a ni a, a pawi ngawt mai. Tun hnua ka ngaihtuah let leh hian ka khawngaih thar riau mai a, tu khaw khain an ngaihsak vak loh khan Casualty-a zankhuaa hun a hmang turte kha ka ngaihtuahin ka khawngaih thar hle mai a, hetiang hian dawm hlumtu awm loin keini ngei pawh hi kan la awm ve a nih chuan ava rapthlak dawn em ka ti hial a ni.
Ringtu kan nihna kawngah erawh chuan thih hnu piah lam rama beisei tur kan la neih avangin ala inhnem theihna lai lai a awm zawk ang a. Rinna kawnga chak vak lo tan phei chuan Pathian dem mai pawh thil awl tak tur niin a lang. Engpawh nisela, keni ngei pawh hi engtin emaw tak chuan kan khawvel hun tawp hi kan la hmang ve ngeiin a rinawm a, ropui taka inthlahliam aiin Thih hnu piah lam rama hmuaktu neih hi alo ropui zawk a ni tih hriain chu lam beisei chuan chaklo tak chungin i kal hram hram zel ang u.