Tata Yodha 4×4 LPS Professional Fight-ah boxer 211 an tel dawn a, Promotional Fight hnuhnung ber 2019 aiin khel tur an tam zawk.
Zirtawpni zingkar atanga chawhma chhung Zarkawt YMA Recreation Centre, Aizawlah tel tuma form theh lutte hriselna endikin an inbuk a, khel thei turin 211 ziah luh an ni.
Weight hrang pangaah title an inchuh dawn a, flyweight (kg 48-52)-ah 75, bantamweight (kg 52-55.3)-ah 36, featherweight (kg 55.3-59)-ah 48, lightweight (kg 59-63.5)-ah 32 leh welterweight (kg 63.5-70)-ah 20 an tel.
Ngaihhlut a hlawh
LPS Promotional Fight hnuhnung ber 2019 khan Mizo boxer 194 bakah, state thenawm Arunachal Pradesh, Meghalaya, Manipur, Assam leh Sikkim atanga sawm bik 12 nen, an vaiin boxer 206 an tel a, tun tumah hian pangain boxer tel an tam zawk.
Karleh Thawhtanni ah LPS Office, Zarkawtah fixture tar chhuah tur a ni a, Nilaini zanah R Dengthuama Indoor Stadium, Mualpuiah inhnek an tan ang.
2009 atanga 2019 chhungin Mizoram Boxing Association leh LPS-in hlawhtling takin Promotional Fight vawi riat a buatsaih tawh a, tun tumah hian kalphung tidanglamin professional boxing beihpui thlak a ni dawn.
Tel tur an hraw
2015 Pro Fight bantamweight champion HC Lalremfela’n lightweight title a chuh dawn a, India super lightweight number one Vanlalawmpuia leh professional boxing vawi khat khel tawh Stephen Lalramsan Varte, Churachandpur, Manipur te nen champion nih an inchuh dawn.
Pro Fight title fight-a vawi hnih inlan tawh F Zoramchhana’n professional zin kawng a zawh mek titha lehzual turin a khel dawn a, bantamweight-ah amateur boxing huanga Mizoram tan hnuhma nei tha pahnih Lalrinngheta leh David Laldanmawia te nen an awm tlang.
Welterweight-ah Pro Fight hnuhnung ber title chuh tur zawnna final khel Zomuansanga leh professional vawi thum a khelh tawha chak vek C Lalhruaitluanga an langsar a; featherweight-ah Pro Fight title chuh tur zawnna final-a inlan tawh Yuri Lalbiakdika Sinate bakah state level-a gold 10 la tawh Lalrosangzuala leh Tuipui boxer H Lalnunhlima te an awm ho.
Flyweight-ah Mizo rawlthar boxer beiseiawm bera ngaih Laldinsanga’n rin a hlawh a, boxer naupang talent nei tha tak tak awmkhawm in Lalchhuanmawia leh Vanlalenkawltira ten beiseina an nei sang hle bawk.
Boxing inelna a la tel ngai lo an thahnem hle a, tawnhriat an neih dan a zirin boxer-te hlawm hnihah then an ni dawn a, tawn hriat nei tawhten stage sang atangin an khel tan chauh ang.