Pakistan-a ruah nasa tak sur leh tui lian mekin mi maktaduai 33 chuang a tibuai mek tih an ram climate minister chuan Reuters a hrilh.
June thla atanga fur ruahtui tla mek leh tui lian kaihhnawiha chhiatna thlengah mi 900 chuang an thi tawh a, ruah tam leh tui lian nasat ber hun an tawng.
Climate minister chuan sorkarin ‘sik leh sa avanga mihringin chhiatna a tawh’ chu theihtawpin a ven hna an thawk tih a sawi.
Suma harsa mek ram hian ram dangte puihna an ngen bawk.
Climate Minister Sherry Rehman chuan an ram hian fura ruah sur hun thin vawi riatna an tawng mek tih a sawi a, “Dan pangngaiah chuan vawi thum vawi li vel a ni thin,” a ti.
“Tui lian thleng nasa lutuk hi mak tak a ni,” a ti bawk.
Nipui a thawh atangin Pskistan-ah hian ruah sur a nasa em em a, tui nasa taka lianin chenna in pawh 4,00,000 chuang a chhe tawh.
Mi 1,84,000 vel an awmna chhuahsan ngaia awmin relief camp-ah dah an ni tih UN hnuaia disaster relief agency, OCHA (Office for the Coordination of Humanitarian Affairs) chuan Ningani khan a sawi.
Mi maktaduai thum vel khuarel chhiatna avanga buai an awm niin a tar lang bawk.
Hetih lai hian Pakistan-a Planning & Development Minister Ahsan Iqbal chuan a hmain mi maktaduai 30 vel, an rama cheng zinga 15% chuang an buai thu a sawi thung.
Chhim lamin ruah hi an dawng nasa a, a bikin Sindh province-ah nasain August thlaa an dawn thin let riat dawn an dawng tawh.
Rehman-i chuan Ningani khan tual chhung thuneituten an in chhuahsante awmna tur puan in maktaduai khat an mamawh thu an thlen niin a sawi.
Sindh-a khawpui lian ber pahnihna, Hyderabad-a cheng nu pakhat chuan Reuters news agency hnenah, “Kan in, hluma siam chung a far nasat avangin naupangte nen rickshaw-ah kan khawsa,” a ti.
“Khawiah nge kan kal chuan ang? Kawtkai zawng zawng tuiin a chim a, bawlhhlawh a inhnawh khawm a, kan inte leh a panna kawngte chu bawlhhlawh paih khawmna a ni ringawt tawh,” a ti.