ZPM Working President K Sapdanga chuan Mizoram tuihalna tireh tura sorkarin kalphung thar a mamawh tihhlawhtlintir theitu chu mipuite an nih thu a sawi.
Zirtawpni khan khawchhak tlangdung fanga feh chhuak mek ZPM hruaitute hian Champhai South Block buatsaihin Champhai Dinthar leh Zotea-ah hun an hmang a. He hunah K Sapdanga hian politics kal sual chu mi tinin an tuar a, politics kal dik chu mi tinin an chhawr a, politics a kal fuh loh chuan khaw kilkhawr apiangin an tuar nasa thin niin a sawi.
K Sapdanga hian mi tinin an hmuh leh an hriat an phat theih miah loh chu ram hi sorkar tha neih chakin a tui a hal tih a nih thu a sawi a. “Mipuite tuihal chhan chu tui in tur tha an hmuh lohna a rei tawh tihna a ni. Kan ram tuihalna tireh turin ZPM chuan sorkar kalphung thar a mamawh tih hi a auhla a ni a, chu mi hlawhtlintir theitu chu mipuite kan ni,” a ti.
Zirtawpni vek khan Aizawl West III ZPM Block-in political training an neih chu ZPM Leader Lalduhoma leh bialtu MLA VL Zaithanzama bakah Ramthanzauvi, AMC Ward XIV Councillor-te’n an hmanpui bawk.