Mizoram Pradesh Congress Committee (MPCC) President Lalsawta chuan Congress party-in Mizoramah ram rorelna tha, mipui leh kohhran duh dan ang neih an duh tih sawiin, ram siam tha turin an rilru leh ngaihtuahna a inpeih a, chumi atan thil hlanah an inhlan tih a sawi.
Zirtawpnia Thakthing venga Aizawl South II Special Block Conference hmanpuitu, Lalsawta hian Congress party hian Mizoramah ram rorelna tha, mipui leh kohhrante duh dan ang neih hi an duh tih a sawi a. “Pathian min pek ram leh Mizoram mipui hi ram dang aia chhia leh nep a ni bik lo a, dinchhuahpui kan tum a ni,” tia sawiin, Congress hruaitute chu minister leh MLA nih vanga sum ngah aia retheih thlang, rawngbawlsak mipuite retheih leh harsatzia hriaa inpe turin an inhlan mek niin a sawi.
“MLA hlawh a tam tawk, minister hlawh a tam tawk, hei bak duh belhna rilru pu hi ram leh hnam hmelma a ni. Chawm bawk, hawp bawk lam a ni lo, rawngbawlna a ni,” Lalsawta’n a ti.
Sorkar hna chu khawvel ram changkang ber berah pawh an indaih chuang lo tih sawiin, lo neitu, kuthnathawk leh thalai tam takte tan eizawnna ngelnghet buatsaihsak hi ngaih pawimawh ber a nih tur thu Congress president hian a sawi a. Thlai thar chhuah tam leh ran vulh tam te, dik taka sumdawn leh a hralhna rate pawh mi dang el pha a ngaih avangin consultant tha leh rintlak hmangin hmangin Mizoram hi a tihhausak theih a, a dinchhuahpui theih a nih thu a sawi bawk.
Aizawl South II Block Special Conference hian ram leh hnam, sakhua tluchhe mek tung dinga siam tha tur leh dinhmun harsa rahbi tleu tawhte tana belhtlak thutiama ding tlat thin Lalsawta kaihhruai Congress party hi ram dinhmun siam tha leh tura an ring tawk thu leh, ram tana rotling tam tak siamsak tawhtu, ram hmasawnna ngai pawimawh thalaite hmakhua ngaia hmathlir thui tak nei Congress party hi khawvel thang zel mila kan ram leh hnam kaihruaia danglamna thlen turin an ring tawk tih resolution an siam a ni.