Australian police-te chuan methamphetamine tonne hnih dawna rit an man a, an rama ruihhlo an man tam ber tum a ni.
Police hian an rama ice tia an sawi mai ruihhlo chi khat, kg 1,800 (tlang 283) hi Sydney lawngchawlh hmunah shipping container lian chhungah an hai chhuak.
Marble hmanga tuam a ni a, khawlaia an hralhnaah chuan A$ tluklehdingawn 1.6 chuang man a ni.
Middle East atanga la luttu nia an puh mipa pathum man an ni bawk.
Thuneitute chuan heng mite hi khawvel ram danga mite nen liantham takin inzawmna an nei niin an sawi.
New South Wales Police chuan zawmpui nei anga ngaihna hi an mi mante hian pha mah se hetianga ngampa taka liantham taka an lak luh ngam avang hian anmahni ngawt chu a nih a rinawm loh tih an sawi.
“A tam leh lutuk, Australia-a kan man tam tham ber a la ni,” tiin Det Chief Supt John Watson chuan a sawi.
Australia-ah hian tun laiin an ramah meth hi a tam tih thuneitute chuan sawiin ‘ice epidemic’ a thleng niin an sawi mai a. Ruihhlo a tam hian tharum thawhna a tam a, a ngai leh rilru lama harsatna nei an tam phah niin an sawi.
An ram hi a mihring cheng azira methamphetamine ti tamna ber niin mihring maktaduai 1.2 velin an ti a, mi cheng 6% zet an tling tihna a ni.
Tun thla tirah pawh khan police chuan Sydney lawngchawlhnaah tho hian Bentley car hlui takah methamphetamine hi kg 150 chuang an lo man tawh.
Thu an dawn bawhzuiin ramria duty-te chuan car changkang, Canada atanga thleng hi an X-ray a, thil rinhlelhawm an hmu.
Police-in an dap zuinaah a headlight phena ruihhlo an thuhruk chu an hmu ta a, methamphetamine kg 161 leh cocaine 30 lai a ni a, mipa pathum an man tel.