Liverpool in Premier League chanchin a inhnehna chiang ber record an tluk a. An mualah kaithar team Bournemouth 9-0 in an sawp.
Jurgen Klopp-a team te hi season bul an tan dan avangin sel an tawk a. Draw vawi hnih leh an hmelma Manchester United lakah an tlawm. Hei vang hian an chungah beiseina mit a fu nasa.
He selna hi nasa leh ring takin an chhanglet a. Anfield a an fans te hmaah a tir atanga a tawp thlengin tha an thlah lo.
Record siamna inkhel
Liverpool in goal khung turin hun an mamawh rei lo, minute 3-naah Luis Diaz chuan goal hmahruai a tauh lut a. Harvey Elliot leh Trent Alexander-Arnold ten goal mawi khung lehin an goal thum hi Roberto Firmino siamsak vek a ni.
Brazil forward in an goal li na khungin corner atangin Virgil van Dijk-a’n a tauh lut a. First half a goal nga an khung hi Premier League record thar a ni.
Second half tan velah Chris Mepham chuan an lamah a ti goal palh a. Firmino in chhunzawm lehin Diaz-a’n an goal hnuhnung ber a khung hma in mi thar Fabio Carvalho chuan goal a khung ve leh bawk.
Liverpool hian kum 1995 leh nikum a Manchester United in record an lo siam tawh leh kum 2019 a Leicester City in an lo siam tawh record chu an tluk chiah.
“Kan bul tan dan khan min ti lawm ber. 5-3-2 an hmang a, Scott Parker-a’n a lo hlawhtlinpui tawh a ni. Khelh harsa kan tih thin a ni bawk a, mahse kan buai phah lo kha a lawmawm hle.” Klopp chuan a ti.