Prime Minister Narendra Modi chuan Inrinnia Gujarat-a Atal Bridge a hawn hnuah a chenna inah a nu, Hiraba Modi a tlawh.
Modi-a nu hi Raisan, Gandhinagar-a cheng niin Ahmedabad-a Sabarmati lui chunga dawh a hawn hnuah hian a tlawh a ni.
A pian leh sei lenna, Gujarat-ah hian Modi-a hi Inrinni leh Pathianni hun hmang tura duan a ni a. Tlai lama darkar chanve vel a nu ina a kal hnuah hian Ahmedabad-ah Khadi Utsav-ah a tel zui niin a nau, Pankaj Modi chuan news agency PTI hnenah a sawi.
Prime minister hian June 18 khan a nu kum 100 tlin lawmpuiin a lo tlawh tawh a. Blog-a thu a dahah pawh kum 2022 chu a nu tan a hlan thu leh a pa pawh kuminah vek kum 100 a tlin thu a tar lang.
A nu a tlawh hnuah hian prime minister hian Gandhinagar-a Raj Bhavan panin a riak a. Pathianni khan Kutch leh Gandhinagar-ah hun a hmang leh.
Ahmedabad-a Inrinnia a lei hawn, Atal Bridge hi kea kal leh thirsakawr khalhtute tan bika duan a ni a. “Gandhinagar leh Gujarat hian Pu Atal-a hmangaihna nasa takin an lantir a. Kum 1996 khan Pu Atal-a hi Lok Sabha-ah Gandhinagar-ah hian record siamin thlan tlin a ni a. He lei hi mipuite hnen atanga amah hriat rengna a dawn a ni,” tiin a sawi.
Prime minister hian charkha (spinning wheel) nena an inkungkaihna pawh sawiin a naupan laiin a nuin charkha hmanga hna a thawh thin thu a sawi.