Vawk tam tak suattu pul hri chi khat, African Swine Fever (ASF) leng chu a ziaawm tan a. Hri vanga vawk suat neitute hnena zangndawmna pek tur chu bank-ah dah ni tawh mah se a dawngtu turte account-a a luh hun tur a la hriat loh.
ASF hi nikum March thla atang khan Mizoramah a leng tan nia ngaih a ni a, vawk thi finfiah hmasak ber chu Lunglei district chhung, Lungsen khuaa mi a ni a, hri a kai tih hi March 21, 2022 khan hmuh chhuah a ni.
Vawk pul hri leng hi a ziaawm tan tawha ngaih a nih hnu, kumin February thla atang khan Champhai district chhung atangin a leng nawn leh a, nimin thleng khan vawk 10,399 a thi tawh.
August thla laihawl vel atangin ASF leng hi a ziaawm tan a, ni tina pul hri vanga vawk thi a tlem chho zel.
Nimin khan vawk pul hri vanga vawk thi chu Mizoram pumah pakhat chauh a awm a; vawk thi awm chhun hi Lawngtlai district-a Tialdawngilung khuaa mi a ni.
Kumin February thlaa ASF leng nawn hian district 11-a khua leh veng 143 a tuam a, hri leng nawn hnua ASF vanga vawk thi zawng zawng chu 10,399 tling tawhin pul hri darh zel tur venna atan vawk 8,941 suat a ni tawh.
ASF hri leng thawh khatnaah khan vawk 33,000 chuang a thi a, vawk 10,000 chuang suat a ni bawk niin vety department chuan an chhinchhiah a ni.
Pul hri ASF vanga nikum 2021 chhunga vawk suat neitute hnena zangnadawmna pek tur sum chu July 26, 2022 khan Vety Minister Dr K Beichhua’n tlangzarh tawh mah se vawk suat neitute hian tun thlengin sum hi an la dawng lo nia thudawn a ni.
Hemi chungchanga The Zozam Times zawhna chhangin Vety department hotute chuan zangnadawmna sum chu HDFC bank-ah sem theih tura dah a ni tawh a, a dawng turte bank account-ah thun luh zel theih tawh a nih thu an sawi a, bank-in a dawng tur hnena an thun hun nghah a nih thu an sawi.
Vawk suat neitu zangnadawmna dawng tur hi mi 2,488 niin, a vaia sum pek chhuah tur hi Rs 1,04,842,200 a ni.