An hruaitu lawk tak takte tun hnaia an chhuahsan mawlh mawlh laiin Congress party chuan an president thar chu thlan chu October 17-ah an huaihawt dawn a, vote tlate chhiar a tul chuan October 19-ah chhiar a ni ang.
Party rorelna sang ber, Congress Working Committee (CWC) chu Pathianni khan thukhawmin All India Congress Committee president thlan hun tura ruahmanna siam chu an pawm a ni.
President thlan tur hriattirna hi September 22-ah chhuah a ni ang a, chuh tum tan September 24 atanga hming pekna hun hawn niin September 30 thleng pek theih a ni dawn a. Inthlan hi a tul a nih chuan October 17-ah inthlan tura tih a ni.
Congress MP Rahul Gandhi pawhin ral atanga CWC meeting hi chhimin president lailawk, Sonia Gandhi-i’n a kaihhruai a, Priyanka Gandhi Vadra a tel bawk.
Tun tum an thutkhawm hi an hruaitu hlun tak, Ghulam Nabi Azad leh thalaihruaitu, Jaiveer Shergill-a ten an chhuahsan hnu lawka neih a ni a. Gandhi-i hnena a bânna lehkha a thehluhah Azad-a chuan Gandhi-a chu nasa taka sawiselin ‘party-a inrawn khawmna awm thin tichhe vektu’ niin a sawi.
Thutkhawmah hian G-23 an tih zinga mi, Anand Sharma; prime minister hlui Manmohan Singh; an party central election authority chairman Madhusudan Mistry; K C Venugopal; union minister hlui – Jairam Ramesh, Mukul Wasnik leh P Chidambaram te leh Rajasthan Chief Minister Ashok Gehlot leh Chhattisgarh Chief Minister Bhupesh Baghel te an tel bawk.
CWC thutkhawm hma hian party chhunga mite chuan president thar tur thlan chu chawlhkar eng emaw zat an pawt tlai dawn niin an sawi a; mahse, October-ah chuan a nghet neih hman ngei tum a nih thu an sawi tel.
Congress hian nikum October thlaah khan party president thar thlan hi kumin August 21 leh September 20 inkara neih turin an lo puang tawh a ni.
CWC hian nikum khan block committee leh state tina an unit inthlan chu kumin April 16 leh May 31 inkara neih turin thu a lo titlu tawh a. District committee chief tur pawh June 1 leh July 20 inkarah, state chief leh AICC member turte July 21 leh August 20 inkarah leh AICC president chu August 21 leh September 20 inkara inthlang turin a ti a ni.