Aizawl : Champhai district chhunga fostering climate resilient upland farming system in the north-east (FOCUS) hmalakna zirchianga chamchilh mektu International fund for agricultural development (IFAD) supervision mission team leh district level coordination committee on FOCUS member te thukhawmin, Chak zawka FOCUS project kalpui a, hunbi tuk chhung ngeia zawhfel a nih theih nana pawimawhte sawiho.
He thutkhawmah hian FOCUS line department hotu ten report an pe a. Rang zawka fund dawn a nih theih dan turte, hmasawn tulna lai leh hnathawh hun azira hmalak dan tur duante bakah pawimawh dangte an sawiho a. Hmalakna leh hmachhawpte thlirhona hun tun aia zing zawka buatsaih thin an rawt bawk.
Thutkhawm kaihhruaitu Champhai Bawrhsap James Lalrinchhana’n IFAD supervision mission team-te chu lo lawmin, Champhai district chhunga FOCUS hnuaia hmalaknate chu lawmawm a tih thu leh hmuh nuam a tih thu hrilhin, hmalakna tam zawk a awm zel theih a beisei thu a sawi.
FOCUS project leh line department-te inkarah inpawhtlanna leh thawhhona tha neih a pawimawh thu Bawrhsap chuan a sawi a. Hamthatna leh hmasawnna tam thei ang ber hun bituk chhung ngeia siam a nih theih nan kalkhawmte thahnemngai taka thawhhopuiah a sawm nghal bawk.
IFAD supervision mission team leader Frew Behabtu pawhin hrileng vanga hmalak- na a chak tawk loh thu leh hun tlemte kum 2 vel an neih chu tangkai leh thahnemngai taka chhawr tangkai a tul thu a sawi a. FOCUS hnathawhnaah IFAD atangin fund zaa 48 vel hman a nih thin thu leh a dang zaa 52 vel chu line department atanga beisei thin a nih thu a sawi.
Kum hmasa aiin kumin chho ah hmasawnna hmuh tur a awm tam zawk nia sawiin, lawmawm a tih thu IFAD supervision mission team leader chuan a sawi a. “Hmanrua leh theihna neih ang angte tangkai zawka hman thiam a tul” a ti.
IFAD supervision mission team member 3 – Mission leader Frew Behabtu; Dr. VP Singh leh Dr. Vizokhanyu Yhome ten kar kalta Zirtawpni atang khan Champhai leh a chhehvela FOCUS kaltlanga line department hrang hrang hmalaknate tlawhin, an zirchiang tan a, an ni hi state FOCUS project management unit atangin Joint Director (Horti) Hmangaihzuali leh official dang ten an tawiawm bawk.