India-a political party hlun ber, Congress hian president nghet an nei lo rei tawh hle a, tunah hian Gandhi-a chu sawi rik rin leh hle a ni a; mahse, amah hian a hmaa a lo phat tawh avang leh sawi rik a awm pawha a hnial zel avangin a ni dawn em tih a chiang lo va. Inthlan sawi rikah pawh hian a nu thlaka AICC president ni ngei tura rinna chu a tam hle.
Nilaini khan Gehlot-a chuan president a ni tawh dawn lo nia sawi rik awm chu chhangin an nawr thlu dawn tih a sawi a, hun tawpah pawh Gandhi-a bawk hi an nihtir leh dawn niin a sawi.
Rajasthan chief minister hian Congress chief Gandhi-i nena an inkawm hnu lawkah hei hi a sawi a, an pahnih hian party president ni tur chu thui leh huam zau takin an sawi dun niin a sawi a ni.
Gandhi-a hi Congress president atang hian a lo chawl tawh a, kum 2019 parliament inthlanah khan an party a chet chhiatpui em avangin a chawl.
A aiawh mai tur an awm loh avangin a nu, Gandhi-i chuan a lailawkin a ai a awh a, ani pawh hian August, 2020 khan an hruaitu hlun tak tak mi 23-in lehkha thawna party insiksawi a ngaihzia an thlen hnuah bân a tum a; mahse, CWC chuan a nghet tur thlan a nih hma chu an nawr thlu leh ta a ni.