India rama tualchhung cricket player tha thlankhawm inelna Duleep Trophy khel turin Mizo player pahnih thlan an ni a. Mizoram bowler tha pahnih G. Lalbiakvela leh Bobby Zothansanga ten Northeast Zone ai an awh dawn.
Luangmual pace bowler BV-a leh Chaltlang a cheng Chanmarians CC spinner rinrawl Bobby te hi Mizoram senior team camp Delhi a neih atanga lo haw hlim niin September ni 1 hian Dimapur a NE Zone training camp an zawm ang.
Eng inelna nge?
North East Zone hi India ram hmun hrang hrang atanga player thlankhawmte inelnaah hian player malkhai a team tha bera chhal ngam India player hlun ni phate telna West Zone nen September ni 8 hian Chennai ah an inkhel dawn.
Duleep Trophy hi kum thum BCCI Calendar a telh a nih loh hnuah khelh chhunzawm a ni dawn. Inkhel tur hi Zone team paruk a then niin North Zone, North East Zone, East Zone, Central Zone, West Zone leh South Zone ah te then an ni.
He inelna a inkhelte hi India rama tualchhung player tha rual thlankhawm an ni tawh thin a, tun tumah pawh hian India vice-captain thin Ajinkya Rahane bakah Prithvi Shaw, Manoj Tiwari, leh Shardul Thakur te pawh an tel dawn.
Eng nge an sawi?
Duleep Trophy khel tura thlan an nih hnuah Bobby Zothansanga chuan, “India ram cricketer tha rual khelh thin kha a ni a, hei vang hian awih pawh a la har zawk. A vawikhatna a nih dawn avangin a huphurhawm ve tho mai, chutihrualin theihtawp ka chhuah dawn a, tha taka khelh ka tum. Team tana player pawimawh nih ngei ka tum.” tiin a sawi.
Inelna sang an khelh tur thlirlawkin BV-a chuan, “North East Zone anga Duleep Trophy khelh hmasak berna tura han tel ve chu a lawmawmin a phurawm khawp mai. Season hmasa a khelhdan a zir a thlan an nih thin avangin team che tha deuh awmna zone ah chuan player tha an tam tawh thin hle.”
“Cricket bikah chuan NE lam kan la hnufual hret a, multi day format a nih dawn bawk avangin team lian tan chance a tha hle. Mahni theihna chin a theihtawp chhuah a pawimawh a, kan theihna tha ber lantir turin inbuatsaih ila. A hranpa a han tan leh chuan vak dan a awmin ka hre lo.” a ti.
Mizo player-te hian India player tha te hmachhawnna hun an nei dawn a, an tum tur zone captain Rahane niin Shaw leh Thakur bakah Shreyas Iyer, Rahul Tripathi leh Yashavi Jaiswal tihte an kawl.
Cricket Association of Mizoram Honorary Secretary Mamon Majumdar chuan, “BCCI in North East team anga min chhuahtir hi a lawmawm tak zet. State tin aiawh thei tur player an awm vek hi thil lawmawm tak a ni bawk a, North East selector te chungah pawh kan lawm hle.” tiin a sawi.
North East Zone ah hian player tawnhriat nei tha zawk pawn lam mi guest player pathum lak theih nimahse tualchhung player hlang in an khel dawn.