Aizawl : Tuikum bialtu MLA Er. Lalrinawma’n “Infiamna huang hrang hrangah eizawn theihna a awm tawh avangin theihtawp chhuaha beitute tan kawng zau takin a inhawng tawh” a ti.
Malsawm Suzuki bultuma buatsaih Chhiahtlang local football tournament kharna a hmanpuinaah Er. Lalrinawma chuan Inrinni khan he thu hi a sawi a. Thalaite hmalam hun hi a eng hle tih hre reng turin kalkhawmte a chah.
Infiammite tana hmun hma tha buatsaih zel sorkar thil tum lian tak pakhat a nih thu sawiin, “thalai ten infiamna ngaihluin, taksa leh rilru hrisel neiin, nunkawng dik zawh nan hmang hmang se kan duh a ni” a ti bawk.