India-a Muslim hmeichhia, Bilkis Bano-i pawngsual rawn avanga dam chhung tang tura tih mipa 11-te sorkarin chhuah zalen an nih duh lohna chu nasa takin tihlan a ni.
Kum 2002-a Gujarat-a buaina nasa tak chhuakah Bano-i hi pawngsual a nih bakah a chhungte 14 lai thah an ni.
Pawngsualtute hi mi kum 15 an tan hnuah chhuah an ni.
Hmeichhia leh mipa eng emaw zatin pawngsualtute chhuah an nih duh lohna lantirin an pung khawm a ni.
Indian film star leh hmeichhiate dikna chanvo humhalhna tura beitu, Shabana Azmi chuan AFP news agency hnenah, “Bilkis Bano leh a chhungte thil tawn avangin sorkarin a chhuah leh hetiang kan rama a thleng hi kan duh lo va. Chu chu kan pun khawm chhan leh kan au chhuah chhan a ni,” a ti.
Duh lohna lantirtute bakah hian sorkar hnathawk chawl tawh mi 100 chuang intel khawm chuan Chief Justice of India hnenah pawngsualtute chhuah chuan nakin zela hmeichhiate himna tiderthawng thei niin an thlen.
Pawngsualtute hi India-in zalenna a neih champha, August 15-a lawm khan Gujarat sorkar chuan a chhuah a ni.
Video thehdarhah chuan pawngsualtute tanna, Godhra lung in tualah mipa eng emaw zat an pungkhawm a, an chhuah chuan an chhungten chithlum pein zahna lantir nan an ke an lo khawihsak bawk tih a lang.
Bano-i chuan amah pawngsualtute chhuah an ni chu ‘dik lo’ a tih thu leh he thil avang hian court rorelna a rintawkna thin chu a nghin thu a sawi.