Aizawl: Hachhek bialtu MLA Lalrindika Ralte chuan a bial chhunga khaw hrang hrangte hnenah bungrua a sem a. Kawrtethawveng VC House-a bungraw semah hian khawtlang hruaitute leh pawl aiawhte an kalkhawm.
He hunah hian Lalrindika Ralte chuan thu sawiin, “MLA nih te, minister nih te hi hlawhtlinna ai chuan rawngbawlna lam thil a ni a. Kan rawngbawlsak mipuite tana rawngbawl tur kan ni,” tiin, politics a nih avanga insawichhiat leh indem kual chiam chiamte hi mahni dinhmun thatna tur pawh nise tha a tih loh thu a sawi.
Lalrindika Ralte hian sual leh thil dik lo siam that tuma sawisel te, thu dik puanzarte erawh hi chu thil dang daih a nih thu sawiin, “Chutiang pawh ni loa politics a nih avanga mi dang chhiatna lai zawn ngat ngat ringawt hi chu i sim daih ang u. Pathianin rawngbawl turin min siam a, rawngbawlsak ngai ni loa mi dang tana rawngbawl theitu nih i tum theuh ang u,” a ti.
A bialte tana bungraw hrang hrang a hlante hi MLA fund atanga a lei a ni a. Bungrua a semte chu thutna (chair) – Tuidam-ah 40, Zomuantlang-ah 30, New Kawnpuiah 10, Kawrtethawveng North leh South Branch YMA-ah 50 ve ve; Darlak YMA Run sak tanpui nan Rs 10,000 a hlan bakah Kawrtethawveng Badminton Club hnenah Rs 40,000 leh Govt Kawrtethawveng High School tan water cooler, ceiling fan paruk leh LED bulh 12 a pe bawk.