Aizawl: Lunglei district chhung, Thangpui khuaa Govt. Primary School-a pawl khat zirlai hmeichhe naupang, a sikul thawmhnaw phelhsak a hawtira puh zirtirtu chu police-in an man tawh a, School Education department-in hremna a ni tichhuak thuai dawn.
Tar lan tawh thin angin, Govt. Primary School-a SSA teacher Lalbiakengi chu a zirlai naupang a sikul thawmhnaw hlihsaka saruaka an ina hawtirah puh a ni a, hemi chungchangah hian Lunglei District Child Welfare Committee (CWC) chuan Juvenile Justice (Care & Protection of Children) Act, 2015 tlawhchhanin Lunglei Police Station-ah FIR an theh lut a ni.
Lunglei Police hotute hnen atanga thudawn danin Lalbiakengi hi Inrinni khan manin Lunglei Police Station-ah dah a ni a, a lakah hian Juvenile Justice (Care & Protection of Children) Act, 2015 section 75-na hmangin thubuai siam a ni.
Pawl khat zirlai hmeichhe naupang chunga an zirtirtu chet dan chungchang hi School Education department pawhin chhui chiangin Zirtawpni khan Lalbiakengi hi show cause notice pek a ni tawh.
Education Department hotute chuan Lalbiakengi chu insawi fiahna tura tih nghal a nih thu te, thil thlen dan chhuina report-te zirchian a nih hnuah a chunga hremna tur hi tihchhuah a ni dawn tih an sawi a, Thawhtanniah hremna hi tihchhuah beisei a nih thu an sawi.
Hetih lai hian Thangpui khawtlanga YMA, MHIP leh VC te chuan thuchhuah intawm siamin, an khaw primary school-a naupang pakhat uniform hlihsak a nih chhan an hriat chian hnuah, zirtirtu chu an hriatthiam thu an sawi ve thung.
Thuchhuah an siamah chuan naupang inhauh avangin hmeichhe naupang nu, Lalnunsangi chu Thangpui primary School class room-ah tiang nen kalin, sikul naupangte rikrapin a vau zui niin an sawi a, sikulah hian vawi hnih lai kalin a fate chu sikul kal tawh lo turin a hruai chhuak tih te, hetianga sikul inkaihhruaina a bawhchhiat avang leh zah lo taka a chet zui avangin an zirtirtu lungawi lo hian a lo khap a; a fate sikul kaltir a tum tawh loh thu a sawi avang leh sikul naupang zingah uniform chang lo an awm bawk avangin Lalbiakengi hian ngaihtuahna fim hmang hman lo vin a lo hlihsak ve ta nia an hriat thu an thuchhuahah chuan an sawi a ni.