Aizawl: Sorkar laipui hriatpuinain Sesawng Farmers Producer Company pisa chu Inrinni khan hawn a ni.
Sesawng Field Venga Sesawng Farmers Company pisa hi tlawmngai pawl, Cod Nerc Chairman B Lalchhanzova’n hawngin, hawnna inkhawmah hian company member te, Sesawng MRB manager leh khawtlang hruaitu Joint VC te an tel.
Sesawng Farmers Company hi sorkar laipuiin India rama farmer company sing khat din tura hma a lakna kal zel zinga mi a ni a, National Agriculture Cooperative Marketing Federation of India (NAFED) kaltlanga din a ni a. NAFED kaltlang hian Mizoramah farmers company pali din chhoh mek a ni.
Mizorama NAFED kaltlanga farmer company din theihna tura sulsutu leh pisa hawnna inkhawma khuallian, B. Lalchhanzova chuan Mizorama kawnghmang neia lo neitute kilkawina tur farmer company hmalak a lo ni ve ta hi lo neituten tumruhna leh tih takzeta kalpui tura fuihin, a huhoa lo neituten sumdawnna an kalpui hi India sorkar hian a vei thu leh state chhung bikah chuan agriculture department chu nodal agency an nih thu a sawi.
He hunah hian Sesawng MRB manager leh Joint VC aiawhten thu an sawi bakah, company member-ten company kal dan tur an sawiho nghal bawk.
NGO Cod Nerc hmalakpuina hian Farmers Producers Company pali – Sesawng Company, Khanpui Company, Reiek Company leh Vanva (Mualthuam/ Haulawng) company te din a ni a. India sorkar hian FPC din nan Rs Vaibelchhe 6,865 a dah a, state sorkar department hrang hrangte nena thawkho tura duan an ni.