Aizawl : Aizawl District BJP chuan hmasawnna chanchintha puanchhuahna Aizawl New Market-ah neiin BJP Mizoram Pradesh President Vanlalhmuaka chuan thu a sawi a. Thenawm state te’n hmasawnna an neih angte Mizoramin a neih ve theihna turin mipuite an pawimawh, a ti.
Inrinnia hun an hmannaah Vanlalhmuaka chuan, India ram chu mipui rorelna ram a nih avangin mipuite an pawimawh a, thenawm state te’n hmasawnna an neih angte Mizoramin a neih theihna turin mipuiin duhthlanna dik an hman a tul thu a sawi a. BJP hian central-ah sorkarna an chan avang leh kum 30 chuang an la sorkar dawn avangin party dangte’n an sawi ve theih loh leh an tih theih loh tur hi anni chuan an sawi thei tih a sawi.
Mizoram sorkar chu sumah a harsa hle a, tho chhuak hleithei lo khawpa chhia an nih a hlauhawm tih sawiin Vanlalhmuaka hian, Mizoramin sumah harsatna nasa tak a tawh mek thu leh sum vanzia hretu pakhat chu Bazar nu hi an nih thu a sawi a. Mipui te’n an chanai leh chanvo an chan theihna turin ataka hma la thin BJP party hi kum 2023-ah chuan an sorkar tir a ngai a, chumi hunah chuan central atanga sum lo kalin, a thlenna tur a thleng tawh tur thu leh hmasawnna rualkhai tak a thleng tawh dawn niin a sawi bawk.
BJP in New Market-a hun an hman hi Lallianzela, President BJP, Aizawl District-in kaihruaiin, State President bakah Dr Zonuntluanga, BJP, Aizawl District Prabhari pawhin thu a sawi a ni.