Inrinni chawhnu khan Aizawl West III huam chhunga veng pathum thlanmual intawm kawng siam thar chu bialtu MLA VL Zaithanzama’n a hawng.
Thlanmual hi Bungkawn, Nursery leh Bungkawn Vengthar ten intawmin a panna tur step siam nan hian MLA fund atangin Rs. 9,12,500 sen a ni a. Veng pathum Branch YMA Joint Committee-ten step siam hna hi enpuiin, vantlang kawng tha tak siam a ni ta chu lawmawm an tih thu an sawi.
Aizawl West III bialtu MLA chuan, “Thlanmual hi khawtlang hmun pawimawh ber pakhat leh veng hmel lanna a ni a, chhung tin nghawng leh thlunzawmntu a nih avangin kutkentu branch YMA-te thahnemngaihna a fakawm takzet a. MLA Fund hi party fund a ni lo a, khawtlang huap tul leh pawimawh apianga hman tur a nih angin tangkai taka mipuiten kan hman hi ka duh ber a ni,” a ti.
Hawnna hun hi veng pathum Joint YMA Thlanmual Committee Chairman R Lalhmachhuana’n a kaihruai.