Pakistan-a chengte chuan tui lian nasa lutuk avanga hmun sang leh hmun ro lai an zawn mek zel laiin an sorkar pawhin ram dang puihna a dil mek zel.
Fur ruahtui an dawn meka chhiatna hrang hrang thlengah mi 1,033 an thi tawh a, darkar 24 liam ta chhungin mi 119 an thih belh leh niin National Disaster Management Authority chuan a sawi.
United States, UK, UAE leh ram dang eng emaw zatin chhiatna an tawh mekah hian an pui mek a; mahse, a dang an la mamawh niin thuneitute chuan an sawi.
Pakistan sorkar chuan mi puih theihna awm zawng zawng a dap niin an sawi a ni.
BBC hnenah interior ministry hotu lian, Salman Sufi chuan an ramin ram dang atanga puihna an la dawn tlem thu a sawi.
“Pakistan hian eibar dinhmunah chhiatna nasa tak a tawng mek a; mahse, tun dinhmunah chuan fur ruah kaihhnawiha khuarel chhiatna kan tawh mek hi kal pelh dan ngaihtuah hmasak phawt a ngai rih,” a ti.
Hmasawnna hna thawh tur project hrang hranga sum dahte pawh a tuartute tan an pawh pen thu a sawi bawk.
An ram hmarthlang lam, Khyber Pakhtunkhwa province-ah luite chu an kuang an luan liamin tui a len nasat avangin mi sang tam takin an chenna in chhuahsanin hmun him an pan.
“Kum tam tak rim taka thawka kan sak inte chu kan hmuh lai ngeiin tuiin a la a ni,” tiin kum 23 mi, Junaid Khan chuan AFP news agency a hrilh a. “Kawng sirah kan thu a, kan duhthusam ve thin kan inte chu kan thlir liam ringawt a ni,” a ti.
Chhimchhak lama Sindh province pawhin an tuar nasa hle a, mi sang tam takin an chenna in an tlanchhiatsan.
Pakistani Prime Minister Shehbaz Sharif chuan mi maktaduai 33 chuangin tui lian an tawrh thu a sawi a, hei hi an rama cheng zinga 15% chuang zet a ni.
Tui lian an tawrha thil an chân nasat ber tum, kum 2010-11 chhunga an chan ang zat vel zet an chân niin a sawi bawk.
An rama thuneitute chuan sik leh sa inthlak nasa lutuk chu hetiang chhiatna lian an tawrh chhanah an puh.
Hetih lai hian tual chhung sorkarten tun hma lamin ruahmanna tha an nei lo va, inte pawh tui lianin a lak mai theihna laiah an saktir mai mai thin nia sawi a ni ve bawk.