ZPM Working President K Sapdanga chuan an party anga inlungrualna leh thawh hona tha ang hi party dangin an neih lo a, mi zawng zawng lenna turin nghet takin an ding zel dawn tih a sawi.
ZPM party hruaitute khaw chhak tlangdung tlawha fehchhuak an haw lam chu Khawzawl Vengthar leh Keifanga-ah Tuichang North Block leh |awi East Block hruaitute’n lo hmuakin an inkawm a. He hunah K Sapdanga hian thu sawiin, ZPM chuan Mizo hnam chhuan lo la awm zel tur tana pawi khawih ve loh hram an tum tih a sawi a. “Ram tana mawhphurhna la ngam roreltu nih kan tum a, ram roreltute hi kum nga chhung atana thlan an ni a, inthlan leh huna tlin duh luat vanga dikna kenkawh ngam loh te, tih tur pawimawh tih ngam loh te, tih loh tawp tur tih luih tlat chingte hi he ram hian a chhiatpui ta hle,” a ti.
K Sapdanga hian kum 2018 MLA inthlanpuiah engmah lo atanga bul tanin bial pariat an nei a, khatih laia rorel lai Congress party te’n MLA 34 an neih atangin bial panga an la a, ramri hrulah chauh an chak tih a sawi a. ZPM party chu Pathian malsawm tlaka rinawm leh taima taka thawk zel tura fuihin, “Kan khingpuite an mangang a, INC hotute an khua a har a, MNF lahin engmah dang an ngaihtuah lo. Tuna kan inlungrualna leh thawh hona tha ang hi pawl dangin an nei lo a, mi zawng zawng lenna turin nghet takin i ding tlat zel ang u,” a ti bawk.