Assam-ah kuhva ro phurh theih anga tun hnaia thuthangin Vairengte-a kuhva kudam a tilun leh tan hle.
Myanmar atanga Mizoram kaltlanga kuhva ro tawlh hi Assam sorkarin a dan avangin hun rei tak chu Vairengte leh a chhehvela kuhva kudamte chu a reh hle laiin, tun hnaia Assam-ah kuhva ro phur lirtheite a tlang dawn tih thu thang chuan umzui a hlawh hle a. Vairengtea kuhva kudam-ah load laa kal mai thei turin lirthei lian eng emaw zat awm thar lehin, a tilun thar leh hle nia thudawn a ni.
Thu dawn danin, Assam-a kuhva ro phurh tum hian Vairengte kudam atangin engtik hunah pawh kuhva ro phura tlan chhuak thei turin inring rengin lirthei lian eng emaw zat an awm a; amaherawhchu, heng lirthei liante hi tun thlengin kal ngaihna hre loin kudam leh a chhehvelah an la ding a ni.
Kumin kum tir vel atang khan heng kuhva tawlhtute hian a ruka kal dan tur ngaihtuahin kawng hrang hrang dapin, lirthei tê hmang leh mihringin chhipa phurin Assam an luhpui thin tih hriat a ni a. Kawng dang dapa a ruka Vairengte paltlang awm mah se, hengte pawh hi Lailapur leh Dholai Police ten an lo man thin nia sawi a ni bawk.
Assam-a kuhva ro tawlh chungchangah hian Vairengte leh a chhehvela Mizoram Police duty-te pawh an zingah kuhva ro sumdawnnaa inhnamhnawih leh sumdawngte thurualpui an awm a nih chuan hremna an tawh tur thua an inzilh thin thu sawi a ni bawk.
Assam sorkar-in Myanmar atanga Mizoram kaltlanga kuhva ro lak luhte chu dan loa sumdawnna a nih avangin Assam state-a lut apiang chu man zel a ni a, hemi kaihhnawiha sumdawngte pawh mi eng emaw zat chu an man nghe nghe bawk.