India ramah darkar 24 liam ta chhungin coronavirus kai mi 7,591 hmuh chhuah leh hman niin mi 4,44,15,723-in an kai tawh.
Union health ministry-in a chhinchhiah dan chuan hri kai enkawl lai hi mi 84,931 la awm mekin a hniam zawngin a kal chhunzawm zel.
Darkar 24 liam ta chhung hian mi 30-in thihpui leh hmanin mi 5,27,799-in an thihpui tawh a, thi chhinchhiah thar zinga mi 15 chu Kerala-a a hma lama thi tawh, chhinchhiahnaa telh tlaikhawhnu an ni.
Thi zinga 70% chuang chu natna benvawn nei an ni tih sorkar laipui chuan a sawi a, thi zinga mi hi kum upa lam an tam zawk zel bawk a ni.
Covid-19 kai hmuh chhuah tawh zawng zawng zat atanga chhutin enkawl lai hi 0.19% an la ni mek a, 98.62% erawh enkawl dam an ni tawh thung.
Darkar 24 liam ta chhung hian sample endik zinga 4.58% chuan hri an kai tih finfiah a ni a, chawlhkar khat liam ta chhunga endik zinga 2.69%-in an kai bawk.
Hri kai tawh zawng zawng zinga mi 4,38,02,993 chu enkawl dam leh tawh niin a kai zinga 1.19%-in an thihpui thung.
Mi 30 thi awm belh zingah Delhi, Karnataka leh Maharashtra-ah mi panga theuh an ni a. Mizoram leh West Bengal-ah mi thum ve ve, Kerala-ah pahnih leh Uttar Pradesh, Punjab, Odisha, Manipur, Haryana, Gujarat leh Goa-ah mi pakhat theuh an ni.
Nikum January 16 atanga invenna pek beihpui thlak kal mek zelah health ministry chuan vaccine dose vaibelchhe 211.91 pek a ni tawh tih a tar lang.