Vawk vulhtute ngaihsak a, ngaihtuah zui an la ngai hle
Vawk hri leng vangin nasa takin vawk vulhtuten harsatna an tawk a, sorkar atangin tih theih a tlem em em thung si. Sorkar laipui nawr char char an ngai a, anni puihnain vawk vulhtu thenkhat chuan chhawmdawlna tlem azawng an dawng thei ta. Mahse, a bei tham em em thung a, an vawk chan zat ngaihtuah phei chuan inhnemhnanna tham a ni meuh lo.
Hetih lai hian vawk zangnadawmna hi pekchhuah theih turin minister meuhin a hawnna nei tawh mah se, vawiin thlengin pekchhuah hun tur hriat a la ni lo a, sorkar atanga thudawn dan chuan bank lamin an pekchhuah hun hun an nghak tawp niawm a ni.
Sorkar hian a duh chuan hma a la chak thei khawp a, rang zawk pawhin vawk vulhtute account-ah hian a dah lut thei ngeiin a rinawm. Chutihrual erawh chuan bank lamin an thun mai loh chhan hi engemaw harsatna deuh tak a awm ngei niin a rinawm thung a, a chhan a la chiang thei thuai turah erawh ngai ang.
Vety department hotute chuan zangnadawmna sum chu HDFC bank-ah sem theih tura dah a ni tawh a, a dawng turte bank account-ah thun luh zel theih tawh a nih thu an sawi a, bank-in a dawng tur hnena an thun hun nghah a nih thu an sawi a. Vawk suat neitu zangnadawmna dawng tur hi mi 2,488 niin, a vaia sum pek chhuah tur hi Rs 1,04,842,200 a ni bawk.
Hei hi a hmahruai chauh kha a la ni lehnghal a, sorkar hian midang zel pawhin an dawn ve thuai theih nan hma la chak lehzual deuh se la, bank lam nena buaina engemaw an lo nei deuh a nih pawhin vawk vulhtute harsatna tawh hrerengin kawng awlsam zawn pui thuai teh se.