Rimawi an ngainat dunna atanga hmangaihna lo piangchhuak chuan kum inthlauhna nasa taka thiatin, Muskan leh Farooq Ahmed te chu pumkhatah a siam.
Kum 18 mi Muskan leh kum 55 mi Ahmed te hi Pakistan-a cheng an ni a, an loves story hi thup bo a ni dawn emaw tih laiin, YouTuber leh influencer lar Syed Bast Ali-a’n interview a neihpui atangin khawvel hriatlar an ni ta.
Ahmed hi Muskan te nena in hlat lutuk lova cheng a ni a, an hnai vai maia cheng Muskan zai a hriat atanga ngaina chhovin, an In ah te pawh a leng lut fova. Tichuan Bolly star Bobby Deol leh Rani Mukherjee te channa film, ‘Bada’ (2000) a hla, ‘Na Milo Humse Zyada’ hla a sak atang phei chuan Ahmed hi a tuiral a ni deuh mai a. Muskan lah ni se, Ahmed-a dawhtheihna leh duhsakna tuifawnin a lo chimpil ve reng mai hi a lo ni a. Hmangaihna a piang.
Ahmed hi nupui la nei lo a ni a, mak tak maia Muskan a tawng ta chu pathian malsawmnaah a ngai hmiah. An chhungte lam ve ve hian kum inthlauh em vangin an inngaihzawnna hi an pawmpui lem lova, dodalna pawh a nasa.
Mahse, an pahnih hian pumkhat ni reng tura an intiamnaah eng chen pawh kal an inhuam a, hmangaihna lipui ata pawhchhuah tumna emaw thenhran tumna reng reng chu thih thain an do dawn a, an nunna hial pawh an hlan dawn, tih an sawi.