Mizorama lui awmte humhalhtu pawl, Save Mizoram Rivers (SMR)-in National Highways & Infrastructure Development Corporation Limited (NHIDCL)-in Mizorama kawngpui sial hna an thawh avanga nasa taka environment tihchhiat a nih chungchang National Green Tribunal-a thlen an tum.
SMR hruaitute chuan nimin khan Aizawl Press Club-ah thuthar thehdarhtute kawmin he thu hi an sawi a. SMR working Chairman Vanneihthanga Vanchhawng chuan NHIDCL-in Mizoram hmun hrang hrangah an kawng laihna vungte mumal lo takin an paih nia sawiin, leivung paihna tur spoil bank pawh a hming chauhin an siam niin a sawi.
NHIDCL hnathawhna leivungte chuan lui leh ramngaw nasa takin a tichhia a, an hriat chinah pawh thal lai pawha kang lo lui panga chu leivung hian a chhilh bo tawh niin SMR working chairman chuan a sawi a. NHIDCL-in Vairengte leh Sairang inkar kawng thlur lia an zauh turah pawh sorkar leh mipui lo inrinlawk tul an tih thu sawiin, “Tuna kawng an laih tawh china an chet ang mai maia an chet leh chuan environment nasa taka an tihchhiat belh a hlauhawm,” a ti.
SMR working chairman chuan environment humhalh kawngah forest department leh district tina thuneitute an muthlu rei lutuk nia sawiin, “Nasa takin kan environment a lo chhe hman tawh,” a ti a. Tunah erawh chuan chief minister atanga thuneitute dangte pawhin ngaihven a tulzia an hre chho thar tawh nia sawiin, ngaihpawimawh chhoh zel a tul thu a sawi.
SMR Chairman Prof H Lalthanzara pawhin Sairang leh Khamrang inkar kawng (NH 54) sira bawlhhlawh paih ruk awm thin pawh pawi an tih thu leh helaia bawlhhlawh paihte hi Tlawng luia a luh thlak nghal mai thin thu a sawi a. Helai hi ram dang khualzinte veivah tamna a nih bawk avangin hriselna khawih chhetu leh Mizoram hmel tibaltu lian taka an ngaih thu a sawi.
Tun hnaiah Kolasib District Magistrate John LT Sanga leh Aizawl District Magistrate Dr. Lalhriatzuali Ralte ten NH 54 kawngpui sira bawlhhlawh paih khapna thupek an tihchhuah avanga lawmawm an tih thu SMR chairman chuan a sawi a. Helai hmuna bawlhhlawh paih ru thin hria leh hmute chuan a rang thei ang bera Sairang leh Kawnpui Police Station hriattir thuai thin tura ngenin, bawlhhlawh paih ru thinte man chhuah kawnga thuneitute pui theitute chu SMR hminga lawmman pek an nih tur thu a sawi bawk.