Aizawl: Chawlhkar kalta Zirtawpni vela ruah sur nasa avangin Siaha leh a chhehvelah chhiatna tenau thleng nualin, tui lianin Tisopi lei a lak avangin tlawhpawh theih lohin khaw pali an awm mek.
Ruahsur nasa avanga tui lianin Tisopi lei a lak avangin Tipi Ferry, Siasika, Amotla leh Thiahra khuate chu harsatna tawk mai thei dinhmunah an ding mek a. Tisopi atanga motor kawng (jeapable road) pawh fur a nih avangin kal ngamna chi a nih loh avangin khawi atangin mahin heng khaw palite hi lirtheia tlawhpawh theih an ni rih lo a ni.
Nimin khan Siaha panna kawngpui NH054, Chhatlaa Saphyna lui culvert chu cement phur lirthei lianin a zawh chim avangin, ke hnih nei lirthei bak tun dinhmunah a kal thei rih lo a, truck pawh a tang mek a ni.
Siaha bialtu minister Dr K Beichhua’n mipuiten harsatna an tawh lohna’n theihtawp chhuaha chin fel hna thawk turin Siaha Bawrhsap Lalsangliana a bepawp nghal a. He kawng leh Tisopi lei tui lianin a lak takte a rang lama siam that a nih theih nan DPR te siama, DM&AR dept-ah thawn tur leh a lo bawhzui nghal tur thu Minister hi Siaha Bawrhsap chu a hrilh a ni.
Siaha Bawrhsap Lalsangliana pawhin a thawhpuite chu nimin khan chhiatna thlenna hmunte hi tlawh turin a tir nghal bawk.