Aizawl: Lunglei district-a Thangpui khuaa Govt. Primary School-a pawl khat zirlai hmeichhe naupang sikul uniform phelhsaka hawtirtua puh, he sikula thawk SSA teacher PC Lalbiakengi chu suspend a ni.
Sikul naupang uniform phelhsaka hawtirtua puh zirtirtu, PC Lalbiakengi, Lunglei Farm Veng chu kar kalta Inrinni khan police-in manin, Juvenile Justice (Care & Protection of Children) Act, 2015 section 75-na tlawhchhana thubuai siamsak a nih avangin a hna atanga chawlh lailawktir a ni a. Nimin khan suspend order chu tihchhuah a ni.
Tar lan tawh thin angin Govt. Thangpui Primary School zirtirtu, PC Lalbiakengi hi a zirlai hmeichhe naupang pakhat uniform phelhsaka saruaka sikul atanga hawtira puh a ni a. Hemi chungchangah hian Child Welfare Committee (CWC), Lunglei chuan Inrinni khan Lunglei Police Station-ah FIR thehlutin, hemi ni vek hian pawikhawihtua puh chu man niin, Lunglei District Jail-ah dah a ni.