- Zirsangkima
Thei rah hmin, sen tai têk lawh lam ni loin, lawh châka ràl atanga lo awha lo ràl tuihàl ve ngawt thu kan sawi dáwn. Thawhrimna leh tumruhna te, tih tak zeta beihna te, tawrh fan fanna te, tei rei peihna leh beidawn duh miah loh avàngtea miin hlawhtlinna an chan cháng hian, hlawhtlinna chang tùra an beih dàn thlír lo a, an chan—a rah an lawh leh an hlawh chhuah—hlawhtlinna leh chawimawina an dawnte hi, ràl atanga lo awh ve ngawih ngawih hi a awl thin ngawt mai. Zirna kawngah a ni emaw infiamna kawngah a ni emaw, hna kan thawhnaah emaw, a! a eng kawngah pawh ni se, thu thluang duai chunga mí hlawhtlinna lo awh ve ngawt a, thîkna rilru lo put hial mai te pawh thil awl tak a ni thei ang.
Tûnlai khawvêla football khèl thiam ber pahnih, a tù zâwk nge thiam zâwk tia mi tam tak inhnialna siamtu Cristiano Ronaldo leh Lionel Messi te hlawhtlinna leh ropuinate hi a awhawm ngawt mai. Mahse, retheihna avànga an khaw khèlmuala inkhelhna hmun pawh chang pha loa mahni tualzáwla ke lawnga búr chhia an pèt mai mai thin laia an dinhmun chu kan awt leh hauh si lo ang!
Mi tam tak hi chu Sámdàla’n a ban phâk reng chengkek hmin tai hlar mai, lo peih si loa a tlâk hun nghâka a hnuaia ka áng huau-a a lo mu zuar ang kha kan ang viau àwm e. Hlawh chhuah phú loa chawimawina (lem!) dawn lah kan zak tawh hlawm mang si lo a!
Ronaldo pawh hi kum 2003-a Manchester United a zawm hma khán, thlawhtheihnaah a la chuang ngai miah lo an ti! Football avànga vawiina a hlawh chhuah, India tangka fai `37,41,86,05,000 nei tawh, kum 37 mi ni tawh hian, ‘Inzirna hian tàwpin tai a nei theiin ka hre lo, hmasâwn zêl ka duh a, ka theihna hi la hman chhuah zêl ka duh … Coach leh fans lam tih làwmna mai ni loa, mahni lungawi veng vengna tùr khawpa inkhelh ka la duh a ni,’ a la ti cheu mai.
Khawvêla football khèl thiam berte hnêna chawimawina an pêk thin, Ballon d’Or tum ruk ngawt chawia chawimawina dawng tam ber nihna hauh méktu Lionel Messi pawh hian, retheihna leh harsatna namén lo a lo paltlang tawh a. A naupan laiin natna khirh tak Growth Hormone Deficiency (GHD) a nei a. He natna avàng hian a naupan laiin a theihna nasa tak a hloh nia sawi a ni. Mipa naupang kum 11 mi chauh a nih laiin he natna hian a tlâk buak tan a. Zan tin a ke-a chiu (jection) a ngai thin. Amah enkawl nán hian sum tam tak an inséng a, an chhúngkaw khawsak paw’n a tuar nasa hle thin. Kum 13 mi a niha FC Barcelona club a zawm khán, club lam hian a inenkawlna tùr an tumsak ve chauh a ni. Tûnah chuan a natna chu hneh tawhin a naupan laia duh leh nih a châk ber thin, footballer ropui bera mi tam takin an chhàl chu a ni ta a ni.
Tumruhna leh thawhrimna chuan a ti chhel a; chu chu hlawhtlinna, thei rah lo tùra mihringin a zawh tùr kawng hmasa chu a ni rêng a ni. Keini pawh, hêng zawhna hi inzâwt ia: ‘Tùna ka awm ang hian lehkha zir zêl ila, hlawhtlin ka phú ang em?’ ‘Tùna ka hnà thawh ang hian thawk chhunzawm zêl ila, chàwimàwi ka phú ang em?’ tih hi.
Vawiina hlawhtlinna changa chàwimàwia awma ‘a rah’ lotute hi, ‘a rah’ an lawh hnuah kan awt ve chauh thin a. Thei rah lo tùr chuan thei kûnga làwn a ngai a; ràl thlìra lawh chi a ni lo a, ràl awha a tuina tem theih a ni hek lo. Tin, thei rah chu thing lèrah a rah thin a, thing bulah a rah ngai lo. Tha thawha lawh theih a ni chauh thin. Chutiang chiah chuan hlawhtlinna chan duh eng ang mah ila, insènsò kan inhuam si loh chuan, kan duhna chu a thlàwn mai a ni ang.
Mi hlawhtlingten a rah lo tùra an thawhrimna te, an beih fan fanna te, hrehawm an paltlang zozai te, an taimâk fàlna te, mi dang aia an mut tlèm zâwkzia leh thenrual an kawm tlèm bîkziate hi hmuh kânin a rah chauh awtin kawng alsawm leh pumpelh kawng zawha a rah lawh kan tum ve ringawt thin. Hei hi hlawhtlinna chang tùra zin kawng zawh dàn tûr dik a ni ngai lo.
Mi dang hlawhtlinna awt ringawt tùra din leh siam kan ni lo tih i inhre thar ang u. Pathianin kan hmaah hian, kan lawh tùr hlawhtlinna leh chawimawina rah hmin duhawm tak min chhawpsak theuh a, chumi lo thei tùr chuan tan i la thar teh ang u khai. Mi lawh sa thei rah hmin eitu ni loin, a kûng láwn chhuaka kan lawh, kan hlawh chhuah ngei ei tùrin rilru thar pú ila; kan hmabâka kan hnà theuhah, taimâkna leh rinawmna nèn, thahnemngai taka thawkin, mi thei rah lawh sa awt mai loa a lotu, mahni lawh sa eitu nih i tum theuh ang u.