UN hnuaia nuclear viltu pawla endiktu (inspection team) chuan Ukraine-a indo mekna hmun, Zaporizhzhia nuclear power plant chu a him tawk em tih endiah turin an kal dawn tih an pawl hotuin a sawi.
International Atomic Energy Agency (IAEA) Director General Rafael Grossi chuan team hian plant hi tun kar tawpah an thlen hman a beiseiawm tih a sawi.
“Ukraine leh Europe-a nuclear facility lian ber himna hi kan vawnghim ngei tur a ni,” tiin Twitter-ah a tar lang.
Nuclear plant hi Russia-in Ukraine a rân hnuah an sipaiten March atang khan an la awmchilh char char a ni.
Ukraine chhimchhak lama an hmun leh a chhehvelah hian inkahna a nasa hle a, hei hian khawvel mite ngaih a titha lo va, a himna a derthawng niin an ngai a ni.
Ukrainian President Volodomyr Zelensky chuan Ningani khan Europe chuan ‘pen khat chauhvin’ radiation avanga chhiatna rapthlak tak a hlat tih a sawi a, hei hi he plant atanga Ukraine-a power grid-a power pek chhuah tihtawp leh power pek nana back-up generator an tihnun laia a sawi a ni.
Thil kangin a chung lama power line a tichhia a, hei vang hian a vawi khat nan plant hi tihthih a ni tih a sawi.
Ukraine leh Russia chuan he thil chhiaah hian an inpuhtawn a, an chetna avanga chhia ta angah an inpuhtawn a ni.
Russian sipaite hian March thla tir khan plant hi an thunun tan a, harsa tak karah a enkawltu leh thawktu erawh Ukrainian staff an la ni.
Kremlin chuan a hmain international inspector-te tlawh chauh a phal thu a lo sawi tawh a, tuna IAEA-in a endik tur hi a hmuna thil thleng leh awm dan dik tak hriat theihna tur a nih avangin a pawimawh hle a ni.
Ukraine chuan a tirah IAEA-in Zaporizhzhia an tlawh tur hi Russian-ten an luah mek nemnghehna ang lek a ni ang tih hlauvin a duh lo va; mahse, tunah erawh chuan endik hi tha a ti tawh.
“Ni tin deuhthaw Zaporizhzhia nuclear power plant leh a bulhnaiah thil a thleng a. Hun remchang dang nghah theih a ni tawh lo,” tiin IAEA director general chuan a sawi.
Mi thiamte chuan a bul vela silaia inkah leh laipuia kah vel chu thil hlauhthawnawm ber a nih loh thu an sawi a, plant hi a hungna bang chhah tak nei a ni.
Hetih lai hian electric a pek chhuah tihtawp chu a hlauhawm em em thung a. Nuclear reactor-in power supply a dawn loh leh back-up generator hmanga pek ringawt chu reactor lairil tihdaihna khawp a tling zo lo va, chu chuan fuel a titui thuai dawn a ni.
Ukraine leh Russia hian a bul vela laipui kaptu-ah nasa takin an inpuh bawk.