Hnam Pa, Mahatma Gandhi-a leh a khadi movement chawikan nan Assam sorkar chuan an hnuaia hna thawk zawng zawngte hnenah tun thla atang hian khadi kawr/puan an pe dawn.
Khadi puan, eri shawl leh kawr fual chu Grade IV mipa leh hna thawk dang hmeichhiate hnenah a tahtawlin an pe tan dawn.
Chief Minister Sarbananda Sonowal-a kaihhruaia sorkar hotu lawk thukhawm chuan Prime Minister Narendra Modi-an mahnia ram intodelh, Atmanirbhar Bharat a kalpui leh Assam-in ama kea din a tumna kal zelah hetianga hma lak hi an rel.
An state handloom & textiles department chuan sorkar hna thawk hnena khadi pekna tur hi an kalpui dawn a. Sonowal chuan Handloom & Textiles Minister Ranjit Dutta chu hlawhtling taka kalpui a nih theih nan hma la nghal turin a ti.
“Sorkar chuan state chhunga khadi industry tihhmasawn nan a hnathawkte hnenah khadi hi a sem dawn a. Sem chhuah thawh khatna ringawtah pawh tual chhunga la kaih thin mi 80,000 dawnte chu nasa takin ei zawnna leh sum a siamsak dawn a ni,” tiin Sonowal chuan a sawi.