Chief Minister Zoramthanga hova nimina Council of Minister thukhawm chuan Samagra Shiksha hnuaia thawkte dinhmun siam thatna tura rawtna awm te a pawm.
He thutkhawmah thurel tur chhawp chhuah 19 zingah Finance department atanga rawtna lut – Samagra Shiksha hnuaia thawk mi 500 dawn hlawh leh an hamthatna tur chungchang ngaihtuahin, DA 15% leh Medical Allowance bakah an thawh rei dan azirin allowance pek an rem ti.
Finance department atanga rawtna lut tho Department hrang hranga Contract Employee te hnena Dearness Allowance pek pawh pawm a ni a, DA hi 10% pek an ni dawn.
Council of minister thukhawm chuan infiammi, ram chhung leh ram pawn inelnaa hlawhtlinna changte tana Mizoram Sports Incentive Cash Award Scheme 2022 phawrh chu a chhunga inkaihhruaina hrang hrangte zirho in pawm a, ramri luhkhaa Immigration check post din tura chak taka hma a lak mek naah Zokhawthar, Kawrpuichhuah leh Zorinpui Immigration Check Post-ah Mizoram Police tan post 20 siam belh an rem ti.
Home Department hnuaiah vek hian Head Constable (Operator) post 34 chu MPRO, Mizoram Police hnuaia Assistant Sub Inspector (Operator) a hlankai an remti a, Planning & Programme Implementation Department Mizoram Startup Mission (Government Society) din tura rawtna a thlen chu thalai tam tak tan eizawnna ruahman sakna tur tha tak a nih theih dan tur sawihovin, rawtna chu an pawm.
India sorkarin District Rural Development Agencies (DRDA) ti tawp tura thu a chhuah hnua district tina DRDA te District Rural Development Office (DRDO) ah leh a, Project Director (PD) 11 te chu MCS JAG level post a lakluh (encadre) tura rawtna lut chu pawm a ni.
Heng bakah hian Health & Family Welfare Department, Home Department, Finance, Revenue, UD&PA leh FCS&CA Department atanga rawtna lut te pawh pawm a ni bawk.