A KHUH HAWNNA
Instagram hi Millenial leh GenZ te tan social media platform lar ber a ni tawh. Mi tam takin fan ngah tumin photo leh video-sharing app hi an bawh hut hut reng.
Follower ngah tumin an phe vut vut a tiht heih a, hetih lai kara dik lo leh fel lo angreng taka follower ngah tumna leh hmalakna awm ve reng pawh hi hmuh hmaih theih a ni lo.
Celebirty kan tih mai, milar tak takte pawh hian Instagram-a follower nga tumin an tang kawh reng a, sum leh pai hmanga lei leh midangte nena thawk hova follower lem siam ta te pawh sawi tur an awm nual.
Heti anga sum senga follower ngah tuma chetna hi sawi rik a ni reng a, pawisa hlawh nana heti anga mimal leh pawl anga inhmang te pawh an tam.
Mak angreng takin Hollywood lam chu sawi lo ila, Bollywood celeb zingah pawh man chawia follower nei nia puh leh sawi an awm reng a, chun’g zingahchuan Priyanka Chopra Jonas leh Deepika Padukone an langsar.
PRIYANKA CHOPRA JONAS
Tun dinhmuna Instagram-a Bollywood actress follower ngah ber ni mekin, followr maktaduai 81.6 a nei mek.
Amaherawhchu, kum tam vak lo liam ta khan fake follower nei nasaa puh a lo ni tawh. 2019 report-ah London-a inkhuar Institute of Contemporary Music Performance chuan Priyanka hi khawvela milar 10 zinga fake follower ngah falah a lo tarlang tawh bawk a, an sawi danin 46% zet hi ‘bot’ account hmang vek an ni.
DEEPIKA PADUKONE
Hemi report vekah hian Bollywood actress lar tak Deepika Padukone chu hlin luh a ni ve a. Follower 46% vel tho hi a tak tak ni lem lo, ‘bot’ account nei an ni. Tunah hian instagram-ah follower maktaduai 68.6 a nei mek.