Jharkhand-a rorel lai, JMM-Congress tangrual MLA-te chu BJP-in thlema sorkar pheh thluk an tum nia thawm a awm avangin an thenawma Congress rorelna hmun, Chhattisgarh-ah phurh khawm an ni.
Jharkhand-ah hian politics boruak lian tak a inmung mek a, eptu BJP hian Chief Minister Hemant Soren-a chu a nihna chelh chunga thil dang ti tel (office of profit case) tia puhin MLA a nihna atanga a bân an phut.
Soren-a kaihhruai, JMM (Jharkhand Mukti Morcha) chuan he buaina hi remchangah hmangin rorel lai MLA zinga mi an hnena inpe tura thlem thluma sorkar thlak an tum niin an hria.
Thawhlehni chawhnu khan MLA-te hi Soren-a chenna in atangin bus pahniha phurh chhuah niin Ranchi tumhmun panpui an ni a, hetah hian thlawhna hauh lawk sa, charter flight-in a lo nghak a ni.
Tumhmuna thil thleng video thehdarhah chuan MLA rual zingah pawh Soren-a pawh a tel ve.
MLA-te hi Raipur-a Mayfair resort-ah inkulh an tum nia sawi a ni.
Hetianga MLA-te hmun khata khung khawm hi Inrinni tlai atanga intan kha a ni a, Soren-a leh MLA 43 chu an bungrua nen Ranchi atanga km 30 vela hla, Khunti an pan an ni.
Soren-a hi MLA atanga paih thlak mai theih a ni mek a. BJP chuan chief minister ni chung hian inthlan kalphung (election norm) bawhchhiain thil laih chhuahna a nei tel niin an puh a. Saffron party hian inthlan that leh chief minister a bân an phut.
Election Commission chuan he mi chungchang hi ngaihtuah tawhin an ngaihdan pawh governor hnenah an thehlut leh tawh a. Thutlukna hi engtik niah pawh puan theih reng a ni.
Rorel lai party tangrual hian member 81 awmna rorelna inah MLA 49 an nei a. JMM hi party lian ber niin MLA 30 an nei a, Congress-in 18 an nei a. Tejashwi Yadav-a kaihhruai, Rashtriya Janata Dal (RJD)-in MLA pakhat an nei ve a. Eptu lian ber, BJP-in MLA 26 an nei thung.
Minister Mithilesh Thakur chuan rorel tangrual hian speaker nen MLA 50 an nei niin a sawi a, chu chu 56-ah an kai thei reng niin a sawi a. Tuna an MLA-te hmun khata khung khawm ang chu, ‘resort politics’ chu BJP atanga an zir niin a sawi.