Aizawl : Mizoram sorkar flagship programme SEDP hnuaia chhungkaw hmasawnna tinzawna eizawnna ngelghet bul tanpuina tur Family Oriented SEDP chu Lawngtlai district tan Lawngtlai East Bialtu MLA H. Biakzaua chuan nimin khan CYLA Hall-ah a hawng.
H. Biakzaua chuan Mizoram sorkarin tih tum hmachhawp a neihte tam tak a tihlawhtling tawh tih sawiin, tunah chhungkaw eizawnna ngelnghet tinzawna SEDP kalpui tura bul tan chhoh a ni leh ta chu lawmawm a tih thu a sawi.
Agriculture Development Board Vice Chairman chuan, Mizoram sorkarin sorkar laipui atanga sum a dawn tur a dawn tak loh, a hloh cheng vaibelchhe 3,000 vel zet a awm lai leh Covid-19 leng, vawk pul hri leh chhiatna dang thleng avanga ruahman lawk loh sum tam tak hman chhuah a ni chungin hmasawnna hna thawh chawl a ni chuang lo tih a sawi a, “Family Oriented SEDP pawh a tira ruahman angin a tahtawla kalpui chhoh zel tum a ni,” a ti.
Lawngtlai District chhunga SEDP tanpuina dawngtute chu tih tak takna nena bul tan tur leh a hlawhtlin ngei theih nana theihtawp chhuah turin H. Biakzaua chuan a chah a ni.
Lawngtlai district-ah hian MLA bial 3-a khaw 187-ah SEDp danwg tur chhungkaw 4,500 awmin, chung zinga chhungkaw 1,909 chu AH & Vety Department hnuaiah trade thlang an ni a, Agriculture Department hnuaiah chhungkaw 1,640; Commerce & Industries Department hnuaiah chhungkaw 329; Land Resources, Soil & Water Conservation Department hnuaiah chhungkaw 282; Horticulture Department hnuaiah chhungkaw 180; Fisheries Department hnuaiah chhungkaw 79; Urban Development & Poverty Alleviation Department hnuaiah chhungkaw 58 leh Sericulture Department hnuaiah chhungkaw 23 an awm a ni.