India chuan a thenawm, tui lian rapthlak tak a tawrh avanga mi sang chuang an thihna leh mi vaibelchhe thum dawnin an baihvai phah mekna, Pakistan chu puih tumin hma a la mek a, a thenawm rama hotu liante nen an sawiho mek.
The Indian Express chanchinbuin a tar lan dan chuan sorkar hotu lawk chinin inpuih dan tur hi an sawiho tawh a, thutlukna erawh an la siam lo.
NDTV chuan Pakistan hian India hnenah puih a la dil lem lo niin a tar lang a, hetih rual hian an minister zinga pakhat chuan India atang hian Islamabad-ah ei tur (chaw) chawk luh tumna a awm niin a sawi thung.
Hun rei tak ata tawh inhmelma ram pahnih inkara inpuihna tur sawi rik hi Indian Prime Minister Narendra Modi-a’n Pakistan-a khuarel chhiatna nasa tak thlenga tuartute leh thi chhungte a tawrhpui thu a sawi hnu lawkah a ni.
“Pakistan-in tui lian avanga chhiatna rapthlak tak a tawng hi a hmuh leh hriat a hrehawm a. A tuartu chhungkuate ka tawrhpui a, hliam tuar leh khualrelin a tihchhiatte pawh ang taka an dama an indin thar leh thuai theih ka beisei,” tiin prime minister hian Thawhtanni zan khan Twitter-ah a tar lang.
Tui lian rapthlak tak an tawrh mek karah hian Pakistan-ah hian thil man a sang chak hle a, a bikin ni tin mamawh thil leh thlai lam chu a to chak nghal hle a ni.
Pakistani chanchinbute Finance Minister Miftah Ismail-a’n an rama thlai chinna hmunte tuiin a tihchhiat nasat avangin ‘sorkarin India atangin thlai leh ei tur dang chah luh dan a dap’ tih a sawi niin an tar lang hlawm.
“Thlai thenkhat hi khawmuala kan ramrite atanga lak dan dap a ni,” tiin broadcaster Geo News hnenah a sawi niin AFP chuan a tar lang.
“Hei hi thlai man sang leh khawl sa a tlem zel vang a ni a, thil man sang hian mipui phur a tirit lutuk a ni,” a ti nia tar lan a ni.
India hian a thenawm, ramria vawi tam tharuma a lo innawrpui tawh hi kum 2010-a tui lian rapthlak tak a tawrh leh kum 2005-a lirnghing avanga chhiatna nasa tak a tawrh tum pawhin a lo pui tawh a ni.