Tunkarah nipui football player bazar khar a ni dawn a, Premier League club-ten an squad tichak turin tan an la la nasa. An zingah West Ham United leh Wolverhampton Wanderers te pawh an tel.
Hammers in an club chanchin a player manto ber ni turin Brazil midfielder Lucas Paqueta chu kum nga chhung atan an lalut.
Kum 25 mi hian Lyon atangin London hi a pan a. A club thar hian a manah Pound maktaduai 50 an seng dawn. Pound maktaduai 36.5 an pe tla phawt anga, a bak zawk a khelhdan a zirin a ni tawh ang.
An inremna anga an inpe tla vek thei a nih chuan kum 2019 a Eintracht Frankfurt striker Sebastien Haller an lakluhna Pound maktaduai 45 a khum dawn tihna a ni.
Season liamta khan Paqueta hian Ligue 1-ah vawi 35 inkhelin goal 9 a khung bakah assist vawi 6 a nei.Brazil tan vawi 33 inkhel tawhin goal sarih a khung tawh bawk.
Wolverhampton Wanderers in an tlarhma a khel turin striker Sasa Kalajdzic chu Stuttgart atangin Euro maktaduai 18 a lalut turin inremna an nei.
Wolves hian Raul Jimenez nena inel tur striker an dapna a rei tawh a, an beisei ang striker an la nei hleithei lo.
Kum 25 mi Austria striker Kalajdzic hi hun engemaw chen an ngaihven tawh niin kar hmasa a Stuttgart inkhelah pawh telh a ni tawh lo.
London club dang Fulham pawhin Premier League tawnhriat nei tha Brazil midfielder Willian lakluhna an tifel dawn hnai tawh a. Kum 34 mi hian Corinthians a contract a neih chu a tihtawp tir tawh.