AFC Bournemouth chuan Premier League season tharah match li chauh an khelh hnuin an manager Scott Parker chu an ban.
Cherries hi Inrinni zan khan Liverpool nen inkhelin 9-0 in an tlawm a. He inkhel zawhah hian kum 41 mi England midfielder hlui chuan an result chu an tan thil mak a ni lova, an team chu Premier League a team thate nena inel turin an tha tawk lo tih tlang takin a sawi.
Club neitu Maxim Denim chuan an thutlukna sawifiahin, “Scott leh a team te hnathawh hi fak loh theih a ni lova, an hnuaiah season hlawhtling tak kan hmang.”
“Chutihrualin team leh club anga hma kan sawnna turin kan tanrual a ngai. Club dinhmun ti derthawng lo tur zawnga hmasawn tuma kan chet a pawimawh a. Kan hnathawh theuh hi kan inzahsak tawn a tul.” tiin a thutlukna siam chhan a sawifiah.
Bournemouth hi season tan ni a Aston Villa an hneh hnuah Manchester City, Arsenal leh Liverpool te lakah an tlawm a. Team lian laka an tlawm hi Parker an ban chhan tak niin a lang lova. Club lamin squad ti chak tura sum an sen tam tawk loh a sawisel leh thin avangin an ban ta zawk niin a lang.
Premier League season tharah ni 25 chauh hun a hman avangin kaithar club manager ban ran ber a ni a. Kum 18 chhunga Premier League manager August thla a ban hmasak ber a ni bawk.