US Open mipa inelna lamah champion lai Daniil Medvedev chuan hnehna nen bul a tan laiin court chhunga boruak a neihpui hat hat thin a elpui hlun te zing ami Stefanos Tsitsipas a tla nghal.
Kum 24 mi Greek star hi New York-ah hian champion se mipa rankings a No.1 ni a kum khar thei tur panga zingah a tel a, nimahsela Daniel Galan-a’n chiang takin a barakhaih.
Tunlaia player hmuhnawm zing ami nimahse Thawhtanni zanah a talbuai chiang hle a. World number 94 Galan lakah hian game hmasa 11 a hloh a. A tawp lamah tan hmun siamin theihtawp chhuah mahse a tho chhuak leh zo tawh lo.
Colombian qualifier Galan hian Flushing Meadows a main draw a khelh vawikhatnaah result duhthusam neiin 6-0 6-1 3-6 7-5 in a khingpui hi a hneh a. Professional tennis a khelh hnuah a hnehna chan la ropui ber a ni ang.
Tsitsipas a tlak tak avang hian Rafael Nadal, Carlos Alcaraz leh Casper Ruud te chiah world number 1 ni lai Medvedev hi rankings a paihthla thei an awm tawh.
Kum 26 mi Russian star hian tualchhung player Stefan Kozlov 6-2 6-4 6-0 in a hneh ve thung a. Nikuma a Grand Slam title hmasa ber a lakna hmunah hlawhtlin nawn leh ngei a tum.
Arthur Ashe Stadium-ah hnehna chang turin harsatna a tawk lova. Round hnihnaah hian French mi Arthur Rinderknech a hmachhawn leh ang.
Inkhel dangah kum 2012 a champion British star Andy Murray chuan seeded number 24 hauhtu Francisco Cerundolo 7-5 6-3 6-3 in a hneh.
Seeded nihna chang pha tla hma zingah no.10 Taylor Fritz a tel a. Tualchhung player hian a hnampui tho US Open hmeichhe champion vawi hnih ni tawh Tracy Austin fapa Brandon Holt chu 6-7 (3-7) 7-6 (7-1) 6-3 6-4 in a hneh lo.