Minister of State Lalruatkima chuan nimin khan Assembly House Annex Conference Hall-ah sorkar Flagship Programme SEDP Family Oriented chu Aizawl district tan a hawng a, tanpuina dawngtu mi 33-te bank account-ah sum thun nghal a ni.
Aizawl district-ah hian assembly bial 12 awmin SEDP tanpuina dawng tur chhungkaw 18,000 an awm a, chung zinga chhungkaw 7,716-te chu AH & Vety department hnuaia trade thlang an ni a, Commerce & Industries hnuaiah chhungkaw 6,951, Horticulture deparment hnuaiah chhungkaw 957, Agriculture department hnuaiah chhungkaw 850, Land Resourses department hnuaiah chhungkaw 833, UDPA hnuaiah chhungkaw 525 , Fisheries hnuaiah chhungkaw 138, Tourism hnuaiah chhungkaw 23 leh Sericulture department hnuaiah chhungkaw pathum an awm a ni.
Aizawl district tana SEDP Family Oriented hawngtu Lalruatkima chuan SEDP chu kuthnathawktute leh mahnia eizawnna hrang hrang neite din khawchhuahna a lo nih theih nan leh lei rualrem an rah theih nana sorkarin kawng a hawnsakna a nih thu sawiin, tanpuina dawngtute hlawhtlinna chu an tumruhna leh hmathlir an neihnaah a innghat tlat tihte, tanpuina dawngtute chu an chhungkuain leirem an rah theih nana kawng hawnsak an ni tih hrereng tur leh peihpunna dap a he flagship programme tihlawhtlingtu ni turin a ngen.
Ruatkima’n Family Oriented SEDP Programme a hawn rual hian Mizoram Rural Bank chuan tanpuina dawngtu mi 33-te bank account-ah transaction a ti nghal a ni.
He hun hi SEDP District Level Committee Chairman Dr. Lalhriatzuali Ralte chuan a kaihruai a; SEDP Member Secretary Ethel Rothangpuii hnen atangin report tawi ngaihthlak a ni a, rural SEDP hnuai tanpuina dawngtu fu chingtute leh Urban SEDP hnuaia tanpuina dawngtuten thu an sawi bawk.