Iraq khawpui, Baghdad-a kum tam tak hnua buaina chhuak leh lian berah mi 23 an thi.
Shia Muslim puithiam, Moqtada al-Sadr-a’n politics a chawlhsan dawn tih a puan hnuah amah thlawptute leh venhim hna thawktu leh Iran-a hel pawlte chu nasa taka intibuaiin silai leh rocket kah pawh a awm.
Iraq ram hi October thla atang khan inthlan neih mumal theih loh a nih avangin rorelna mumal a awm thei lo.
Sadr-a kaihhruai lam hian inthlanah bial an la tam ber a; mahse, anmahni hnaih bertute nen sorkar thar an siam thei lo va. Hengho hi a tam ber chu Iran-in a thlawp party-te an ni.
Tharum thawhna hi Sadr-a hnuaia sipai, Peace Brigade te, Iran-in a thlawp helho leh Iraqi venhim hna thawktute an ni.
Buaina hi khawpui chhunga Green Zone an tihah a chhuak deuh ber a, heng lai hmun hi sorkar hmun pawimawh leh ram dang embassy awmna hmun a ni a. Dutch embassy-a thawkte chu buaina chhuak avang hian German mission-ah an insawn a ngaih phah.
Buaina chhuak avang hian Iran chuan Iraq nena an inrina a khar nghal a, Kuwait pawhin an mite chu Iraq chhuahsan thuai turin a ti bawk.
Thite hi an vaiin Sadr-a thlawptute an ni a, mi 380 vel an inhliam bawk niin Iraqi damdawi in thawktute chuan an sawi tih AFP news agency-in a tar lang.
UN Secretary General Antonio Guterres-a thupuangtu chuan thil thleng ngaihven a nih thu leh ‘inrem lohna chin fel a nih theih nana rang taka ke pen’ a tul thu a sawi.
Prime minister lailawk, Sadr-a thawhpui, Mustafa al-Kadhimi chuan buaina hian khawpui dang a kan kai zel avangin ram pumah curfew a puang.
Cabinet meeting neih turte pawh thulh a ni a, Sadr-a pawh buaina titawp tura inrawlh turin a ngen bawk.
Sadr-a pawhin tharum thawh leh khawi lam lam pawhin ralthuam an chelek a tawp hma chaw a nghei dawn thu a puang tawh.
Kum 48 mi, Sadr-a hi Iraq-ah chuan vantlang leh politics-a kum 20 vel zet tla na tak a ni tawh a. Mehdi Army tia a vuah hel atanga indin niin kum 2003-a US-in Saddam Hussein-a paih thlak tuma a beihna do letin Iraqi sipai thar nen an indo zui a. A pawl hi tunah chuan Peace Brigades tiin a vuah tawh a. A pawl hi an ramah chuan hel pawl thiltithei leh chak ber an ni mek.