Aizawl: Joint Action Committee on Serchhip District Hospital Site hruaitute chuan Serchhip District Hospital chu a sakna tur hmun ngaiah sak thuai an phut tih an sawi a. Serchhip constituency pawnah damdawi in sawn chhuah tumna an dodal tur thu an sawi.
Nimin khan Serchhip Press Club-ah thu thar thehdarhtute kawmin JAC Chairman Kapliana chuan, “Serchhip district mipuiin tangkai taka kan hman mek Serchhip District Hospital building thar, Power Grid Corporation of India (Ltd) CSR Fund Rs. vaibelchhe 21 hmanga sak a ni tur hi kan lawm hle a. A hmun ngaia hospital building thar sakna tura Detailed Project Report (DPR) siam, dil chhuah leh pek a nih ang ngeia sak thuai hi kan phut tlat a ni,” a ti.
Kapliana Pachuau chuan NGO Co-ordination Committee-in Serchhip District Hospital thar sakna atan Bukpui ram rawtin, chief minister pawhin Bukpui rama sak a nih tur thu Serchhip-ah a puang tih a sawi a. Hemi hnu hian JAC hmalaknain VC, YMA, MHIP leh MUP Branch hrang hrang ngaihdan an lakah a hmun ngaia hospital building thar sak duh an tam zawk thu thlenin chief minister chu a pisa-ah an sawipui a. Hemi tum hian chief minister-in Health Minister Dr R Lalthangliana chu thil awmzia hrilhin, health department thuneitute chu Serchhip-ah tirh niin, hospital thiah chhunga lo luah lailawk tur lo enpui turin JAC hruaitute a ngen tih a sawi.
JAC Chairman hian, “Kan Chief Minister Pu Zoramthanga duhdan angin Health Minister Dr. R. Lalthangliana pawh hi hma la thuai a, chief minister duh dan anga Health Deptt. thuneitute Serchhip ah rawn tir chho a, Hospital thiah chhunga luah lailawk tur building enfel thuai kan phut a ni,” a ti.
Serchhip constituency chhunga hospital awm lai sawn chuah tuma Tuikum bialtu MLA chet dan an ngaimawh tih sawiin Kapliana Pachuau chuan, “Bukpui daia Serchhip Dist. Hospital sawnchhuah a nih theihna atan hian Tuikum bialtu MLA Er. Lalrinawma’n nasa taka hma la in, chief minister leh health minister te, health dept. official te thlengin na takin a kar niin kan lo hria a, hei hi tak tak a nih chuan a pawi kan ti hle,” tia sawiin, Serchhip constituency atangin Serchhip District Hospital hi Tuikum constituency-ah sawn chhuah an phal ngai loh tur thu leh hospital sawn chhuah sak tuma hmalak hi chawlhsan tawh se an duh tih a sawi bawk.