Pakistani planning minister chuan tuna an chhut thuakah tui lian avanga thil chhia chu $ tluklehdingawn 10 hu vel a nih thu a sawi.
He mi hma hian minister dang pakhat chuan Asia chhim lam ram hi hmun thuma thena hmun khat zet tuiin a chim niin a lo sawi tawh.
Hetih lai hian Thawhtanni khan Pakistan hian an ram sum harsatna atanga chhan chhuah nan International Monetary Fund (IMF) atangin $ tluklehdingawn 1.1 an dawng.
He pawisa hi suma talbuai mek ramin eibara an intun din leh nan leh ba an ngah belh lutuk loh nana hman tura an puk a ni.
Tui lian an tawrh mekah hian mi 1,136 vel an thi tawh a, mi maktaduai 33 chuang, an ram mipui 15% chuangin an tuar mek.
Ruah sur nasa lutukin kawngpui, thlai, in, leh leh thil dang tam tak a tichhia.
“Thil chhia hi a tam tham em em a, tuna kan han chhut thuakah chuan $ tluklehdingawn 10 chuang hu a ni,” tiin Planning Minister Ahsan Iqbal chuan Reuters news agency a hrilh.
Iqbal-a chuan kum 2010-a an rama tui lian nasa ber an tawrh, mi 2,000 chuang an thih tum ai khan tuna mi hi a nasa zawk a, ei tur an tlachham dawn niin a sawi lawk.
Ram hausa dangte chu suma pui turin a ngen a, sik leh sa inthlak nasa an tuar nasa niin a sawi.
Ei tur an tlakchham hnaih chungchangah hian Finance Minister Miftah Ismail chuan India atanga thlai lak luh dan an dap thu a sawi.
Asia chhim lamah hian tun lai hi fur hun lai a ni a, ruah a tam thin a. Tun tuma Pakistan-in an tawrh erawh sik leh sa inthlak nasa vanga puh a ni a. Hetih rual hian an ramah hian hmasawnna hna thawh hrang hrangah invenna lam ngaihsak lova hma an lakna chuan nghawng tha lo tak a nei bawk nia ngaih a ni.