Khawvela hmeichhe tennis player ropui ber a chhal Serena Williams chuan a Grand Slam tournament hnuhnung ber ni tura ngaihah Thawhtanni zan khan bul a tan a. Hnehna changin New York khawpui a amah lawmtu entu mipui tam tak hmaah second round a lut.
Williams hian tunhnaiah Flushing Meadows a inelna khelh zawh hian tennis chawlhsan a tum thu a lo sawi tawh a. Hei vang hian a hun tawpna turah ngaihven a hlawh hle.
Arthur Ashe Stadium-ah American chhuanvawr hi mi 25,000 in a inkhel an en a. Montenegrin nula Danka Kovinic chu 6-3 6-3 in kum 40 mi Williams hian a hneh.
Hmeichhe Grand Slam singles title vawi 23 la tawh Williams hian tunhmaa a tuan thatna te nei tawh chiah lo mahse hnehna chang turim tumruhna leh rilru fim a lantir.
A khingpui hi world number 80 niin round hnihnaah fiahna lian a hmachhawn dawn a. World number 2 leh seeded number 2 hauhtu Anett Kontaveit a hmachhawn dawn.
“Helai hmuna inkhelh hi nuam ka tih avangin hetianga a tawpna tur boruak awm hian inkhelh a ti harsa ve tho. Kan inkhelh tam zawh poh leh la khel zel theiah kan inngai. Mahse tunah chuan ka tan hmalam pan a hun ve tawh a, luhchilh duh hrang hrang ka ngah avangin a hun tawh a ni.” tiin Williams chuan a chak hnuah a sawi.
Halep a tla hma
Inkhelh tan zana tla langsar zingah world number 7 ni lai Simona Halep a tel a. Ukrainian qualifier Daria Snigur a hneh zo lo.
Grand Slam a main draw inkhel a hmachhawn hmasak berah Snigur hian 6-2 0-6 6-4 in a khingpui kum 30 mi hi a hneh.
Kum 20 mi world number 124 chuan, “He hnehna hi kan ram tan, ka hnampui te tan, ka chhungte tan leh ka team tan ka hlan.” tiin a chak hnuah a sawi a, Rebecca Marino a hmachhawn leh ang