Aizawl: Aam Aadmi Party (AAP) Mizoram hruaitute chuan Delhi-a an party hruaitu thenkhatte kawmin Mizorama an hmalak dan turte an sawipui.
Ni thum chhung cham tura Delhi-a awm mek, AAP Organising Chairman Andrew Lalremkima leh Treasurer Melanie Zomuanthangi te hian AAP pisa thenkhatte an tlawh bakah Nilaini khan an Delhi-a AAP hruaitu thenkhatte an kawm.
Andrew Lalremkima chuan, “Delhi-ah AAP-in tha takin hna an thawk a, Punjab-ah hnehna an chan hnuin nasa takin hna an thawk leh nghal thei a. An thawh angin Kristian ramah pawh a thawh theih a, an hnathawh ang hi keini Kristian ram nen hian a inrem em em a. AAP Mizoram pawh hian a thawk dawn a ni,” a ti.
AAP chu mi retheite hmangaihtu tih sawiin AAP organising chairman hian, “Mohalla clinic, a thlawna inentir theihna leh damdawi pawh sorkarin a thlawna a pek vekna te, sorkar sikul an siam that te, kut hnathawk mite tana an hnathawh that dante khu Mizoram-ah tih ve theih a ni,” tiin, chutiang tih ve chu AAP thil tum a nih thu leh hna hmasa berah ei rukna nuai bo phawt a tul thu a sawi.
AAP Mizoram hian Mizoram hmun hrang hranga block din turin hma an la mek a ni.