Aizawl : Ngengpui Wildlife Sanctuary leh Phawngpui National Park chhehvel khuaa chhungkaw khawsak harsa thlan chhuahte hnena pressure cooker sem tur chu nimin zing khan Lawngtlai East Bialtu MLA H. Biakzaua’n Lawngtlai College Veng a EF&CC office complex atangin avai liam.
H. Biakzaua chuan, khawvel pumin leilung leh achhevel boruak venhim leh siam that lam a buaipui tih sawiin, ramngaw chereu zel chuan a chhe zawnga nghawng tam tak a neih vanga buaipui ngai anih thu a sawi a, mihringte tana boruak vawng daitu leh boruak tha siamtu, tui hna siamtu, nungchate tana chenna leh eitur petu thing leh mau leh ramngaw chu tichereu lova humhalh leh siam belh zel a tul tak zet tih a sawi.
He huna khualzahawm, Lai Autonomous District Council (LADC)-a Chief Executive Member V. Zirsanga pawhin thu sawiin, pressure cooker sem chhan ti hlawhtling turin ramngaw humhalh leh siam belh lamah thlen chin atanga hmasawn zel turin kalkhawmte leh beneficiary-te chu a sawm a ni.
Tun tuma EF&CC-in thingtuah mamawh zat tihniam theitu pressure cooker an sem hi Compensatory Afforestation Fund Management and Planning Authority (CAMPA) hnuaia Annual Plan of Operation 2020-21 atanga sum dawn atanga ruahman a ni.
Ngengpui Wildlife Sanctuary chhehvel khaw 13-a chhungkaw 620 leh Phawngpui National Park chhehvel khaw 11-a chhungkaw 580, an zavaiin chhungkaw 1,200 hnenah pressure cooker pahnih theuh – litre 3 leh litre 5 sem turin an ruahman a, he’ng khaw tin atanga a dawng thei tur beneficiary hi mipui awm zat atanga chhutin sem rual a ni.